Tungod sa reassessment sa mga benepisyaryo sa Pantawid Pamilyang Pilipino Program (4Ps) sa Central Visayas nga giila nga “non-poor” sa Listahanan 3, gibana-banang 30,600 ka mga indibiduwal ang andam mogradwar sa poverty alleviation program.
Si Analy Janaban, focal person sa Family Development Session sa Department of Social Welfare and Development Central Visayas (DSWD 7), niingon nga ang mga giila nga benepisyaryo gigiyahan pinaagi sa transition program.
“They are set to undergo a transition program for them not to backslide as poor,” matod ni Janaban sa SunStar Cebu sa Dominggo, Oktubre 1, 2023.
Matod pa ni Janaban nga niabot na sa 30,600 ka mga indibidwal ang ilang na-assess nga level 3 o non-poor, sugod niadtong Septiyembre 22, base sa resulta sa Social Welfare and Development Indicator (SWDI), usa ka himan sa pagsuta ug pagmonitor sa lebel sa kahimtang sa pagpuyo sa mga 4Ps nga mga panimalay.
Sulod sa SWDI, adunay kinatibuk-an nga 56 ka indicators ang gamiton sa pag-assess ug paghan-ay sa mga pamilya ngadto sa tulo ka lebel: Level 1, nga nagrepresentar sa survival; Level 2, katumbas sa subsistence; ug Level 3, nga nagpakita sa self-sufficiency, diin ang mga panimalay makasustiner sa ilang kaugalingon.
Kahinumdoman nga niadtong Agusto, ang social welfare agency nagsugod sa pag-evaluate sa 87,244 ka 4Ps beneficiaries sa rehiyon nga giila nga non-poor sa Listahanan 3 aron matino ang ilang kaandam sa graduation program.
Ang Listahanan 3, ang ikatulong pag-uli sa National Household Targeting System for Poverty Reduction, nagsilbi nga sistema sa impormasyon nga gidesinyo sa pag-ila sa mga lokasyon ug mga indibidwal nga nagpuyo sa pamilya nga naglisud.
Giila sila nga mga kabos base sa poverty threshold sa rehiyon nga gitino sa Philippine Statistics Authority (PSA).
Ang linya sa kakabus, nailhan usab nga poverty threshold, mao ang minimum nga kita nga gikinahanglan alang sa usa ka pamilya o indibidwal aron matubag ang mga batakang panginahanglan sa pagkaon ug uban pa.
Base sa datos sa PSA gikan sa Oktubre 2022, ang poverty threshold mokabat sa P13,008 matag buwan alang sa pamilya nga dunay lima ka mga sakop dinhi sa Central Visayas.
Gipasaligan ni Janaban ang mga migraduwar sa 4Ps nga mga panimalay, nga misaad og padayon nga suporta. Iyang gipamatud-an ang kalambigitan sa mga local government units (LGUs) ug partner stakeholders.
Gipasabot niya nga human sa graduation, adunay usa ka tuig nga transisyon nga programa diin ang mga benepisyaryo makadawat og dugang nga interbensyon ug serbisyo gikan sa ilang mga LGUs aron suportahan ang ilang kaayuhan pagkahuman sa programa.