Disbursing officer sa Barili, anak gidakop

Disbursing officer sa Barili, anak gidakop

Disbursing officer sa lungsod sa Barili ug iyang anak gidakop sa kapulisan sa lungsod human gipasanginlang nangawat og kwarta nga gikatakda unta nga i-sweldo sa mga empleyado sa munisipyo.

Gitanggong sa Barili Police Station sila si Lucia Concepcion, 60, designated disbursing officer sa naasoyng lungsod ug Jane Nicole Concepcion, 29, Admin Aid 1 sa Rural Health Unit sa lungsod sa Ronda apan pulos namuyo sa Barangay Poblacion, Barili.

Matod ni Police Staff Sergeant Carlos Dicdican, investigator sa Barili Police station, nga nakuha sa suspek ang P31,000 sulod sa vault sa disbursing office.

“Gi file na namo ang kaso unya gi-detain na namo sila. Dili man sad sila moangkon,” matod ni Dicdican sa Hunyo 7, 2023.

Ang kapulisan nakadawat sa sumbong gikan sa usa ka job order nga gi-assigned usab sa disbursing office kalabot sa hitabo sa Hunyo 6, 2023.

Subay sa taho niini, dali nilang gisusi ang mga CCTV footage sa munisipyo ug nakita nga dunay usa ka babaye nga nisulod sa building alas 8:59 sa gabii sa Hunyo 5, 2023 ug nigawas sa alas 9:07 sa gabii sa samang adlaw.

Sa dugang imbestigasyon, nasuta nga ang maong babaye nailhan nga si Jane hinungdan nga mihimo og hot pursuit operation ang kapulisan sa Hunyo 6, diin naabtan ang suspek sa lungsod sa Ronda diin usab kini nagtrabaho.

Nakuha gikan kaniya ang P19,550 nga cash ug upat ka mga puti nga envelop nga wala na’y mga sulod apan dunay mga ngan sa mga empleyado sa LGU Barili.

Sa samang higayon, gisikop usab ang inahan niini human nasuta nga gihatagan niya ang suspek sa master duplicate key sa vault diin gihipos ang kwarta.

“Possible gyud [nga nakahibaw] kay nganong naa man siya’y yawe? Unya kanang bayhana di man na trabahante diri sa LGU,” dugang ni Dicdican.

Apan si Lucia, sa iyang bahin, nihimakak sa pasangil batok kanila.

Apan iyang giangkon pinaagi sa sibyaanang DYHP RMN Cebu nga iyang gihatagan og yawe ang iyang anak aron mauli ang printer nga iyang gihuwaman aron mahuman niya ang mga dokumento nga gikinahanglan alang sa pagsweldo sa mga empleyado.

Iyang giklaro nga wala niya sugoa ang iyang anak sa gabii ug giingong sa gabii diin nahitabo ang insidente, nag-uban sila sa iyang anak.

Gipakita usab siya sa CCTV footage apan nagtuo siya nga dili kini niya anak.

“Dili ni mao. Nganong makaingon ko nga dili ni mao? Kay didto mi sa among balay nangaon mi og sweetcorn. Dili pod mi tig-anha og gabiing dako. Unsa ma’y anhaon? Ako kahibaw ko modepensa. Ika-duha kon moanha man gani siya kadtong pagka Lunes sa buntag nga nag-uli sa printer namo kay naa man koy gipang print nga report nako,” matod ni Lucia sa Hunyo 8, 2023.

Si Lucia, nagtrabaho sa gobiyerno niadto pang 1996 ug nahimong revenue collection clerk sa Treasury Office sa panahon pa ni anhing Marlon Garcia, kanhi mayor sa lungsod sa Barili.

Ang mga suspek gipasakaan og kasong qualified theft ug theft ug kasamtangan nga gitanggong sa Barili Police Station samtang ipaubos sa inquest proceedings.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph