Diversion roads, drainage system giprayoridad ni Pacaña; Siomai Festival gitutokan karon

Diversion roads, drainage system giprayoridad ni Pacaña; Siomai Festival gitutokan karon

Ang Brgy. Tisa, dakbayan sa Sugbo usa sa mga dapit nga dali mabahaan matag uwan tungod kay kini maisip nga “catch basin” sa tubig gikan sa mga bukiran sa southern Cebu City.

Usa usab kini sa mga agianan sa trapiko, labina niadtong di ganahan mosubay sa N. Bacalso Avenue.

Busa, di ikahibulong nga ang giprayoridad ni Barangay Kapitan Renato “Rigo” Pacaña nga mga proyekto mao ang drainage systems ug diversion roads nga iyang gihuna-huna panahon sa pandemya.

Ang labing dako niya nga mga proyekto mao ang nahuman nga unom ka-road concreting sa unom ka mga sityo nga nagsilbing diversion road aron sa pag-alibyo sa kahuot sa trapiko ug aron matagaan og maayong dalan ang mga motorista, labina ang mga lumolupyo sa Brgy. Tisa.

Kini gigahinan og P115 milyunes sa panahon ni anhing mayor Edgardo Labella ug naay pay lain nga suporta sa Cebu City.

Sa pagkadaug ni Mayor Michael Rama, laing P10 milyunes ang gitagana sa Siyudad alang sa bag-ong road lot sa laing mga sityo sa Tisa.

Apan P2 milyunes pa lang ang nasugdan sa proyekto tungod kay wala pa mahan-ay ang maigo nga mga pribadong luna sa karsada.

DRAINAGE SYSTEM

Matod sa kapitan nga ang Siyudad sa Sugbo nipatuman og P64 milyunes nga drainage project sa Sta. Teresita Village aron di na unta mobaha, apan sa matag uwan, lawom gihapon ang tubig tungod kay ang dapit “catch basin.”

Usa sa iyang gitumbok nga mga rason mao ang mga housing development sa palibot.

Gawas niini, nibutang usab og duha ka dagkong drainage system si Pacaña sa Riva Ridge Subdivision nga gigahinan sa usa ka usa ka kanhi konsehal sa Cebu City.

Naa siyay bag-ong drainage system nga giduso ngadto kang Cebu City South District Rep. Edu Rama sa Katipunan Road lahos sa Mohon 1, nga gibana-­bana nga mogasto og P20 milyunes ngadto sa P30 milyunes.

HEALTH SERVICES

Nagtinguha si Pacaña nga ma­katukod ang barangay og tu­lo ka andana nga health center nga butangan og paanakan.

Matod niya nga wa silay paanakan ug gusto niya nga malahi ang health center gikan sa multi-purpose hall.

Siya nipasabot nga pinaagi niini, mapalambo pa ang serbisyo’ng panglawas alang sa mga lumolupyo sa barangay.

Gusto usab siyang magbutang og daycare center human niya nakita nga daghan sa mga ginikanan nga gustong ipa-enroll ang ilang mga anak og daycare.

MELTING POT

Sa di ka pa maabot sa Tisa Multi-Purpose Barangay Hall, mosugat kanimo sa dalan ang naglaray ug naglinya’ng mga tindahan sa Siomai.

Apan matod ni Pacaña, dili Siomai ang nag-unang street food sa Tisa kay ang mas nabantug mao ang puto ug noodles ug isip lugar nga bisitaon tungod sa nagkadaiyang mga pagkaunan daplin sa dalan.

Apan mga 18 ka-tuig na ang milabay, usa ka lumolupyo nisulay og baligya og Siomai nga naay lamiang sauce ug parisan og puso. Diha nagsugod og kaylap ang la­ing mga tindahan sa Tisa ang Siomai.

Niadtong 2013 ra, dihang usa ka pari nakamugna og konsepto nga himuong festival ang Siomai aron mausab ang imahe sa Tisa nga dili diay kini ubos sa Barangay Labangon, apan usa ka lahi nga barangay.

Karon, nahimong ‘gastronomic location’ ang Tisa’ sa mga food lover ug gustong mopuyo sa Sugbo kay dili lamang Siomai ang makit-an nga baligya, naa usab ang pater, larang, halo-halo, ug uban pa.

MGA KALINGAWAN

Ang bida sa festival mao ang street party nga dayuhon sa mga tawo sa laing mga barangay.

Ipahigayon kini karong adlawa, Setiyembre 24, 2023.

Mga nangaging kalihukan nag­lakip sa:

Sept. 15 - Bingo

Sept. 16 - Skating Contest, Mobile Legends, Zumba ug Parish Night sa kapistahan ni San Lorenzo Ruiz

Sept. 17 - Siomai Fest Cycling Race ug School Night.

Sulod semana gihimo sab ang Battle of the Bands, Dance Revolution, ug Voice of Tisa.

Sept. 21 - LGBTQIA plus community

Sept. 22 - Queen of Tisa

Sept. 23 - Miss Tisa 2023 nga itanyag ang P25,000 sa madaug nga rayna, P15,000, ug P10,000 sa mga runners up niini.

Sept. 24 - Fun Run, Siomai Festival Streetdancing competition 

Sayop: Dunay sayop sa paragraph sa estorya kabahin sa budget sa unom ka drainage systems gikan sa administrasyon ni anhing mayor Edgardo  Labella. Di kini P115 milyunes, kun di P15 milyunes ra. - Editor

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph