Susihon sa Department of Health (DOH) Central Visayas ang bangus nga gikaon sa upat ka construction workers sa Barangay Poblacion, dakbayan sa Lapu-Lapu niadtong Biyernes sa gabii, Oktubre 30, 2022.
Si Major Ramil Dugan, hepe sa Lapu-Lapu City Police Station 3, nitug-an sa SunStar Cebu sa Dominggo, Oktubre 30, nga ilang gisumiter sa ahensiya ang nahabilin sa sinugbang bangus aron masuta kon mao ba kiniy nakaingon sa kamatayon sa 35-anyos nga si Felix Genelazo.
Base sa ilang inisyal nga imbestigasyon, usa sa mga construction worker ang nipalit og usa ka kilo nga bangus sa kantidad nga P30 sa usa ka wala mailhing tigbaligya og isda sa Lapu-Lapu City Public Market mga alas 5 sa hapon sa Biyernes.
Matod ni Dugan, aduna silay person of interest human siya mailhi sa iyang mga kaubang fish vendors gawas sa merkado publiko, apan wa sila kahibawo sa iyang nahimutangan.
Siya niingon nga ang kapulisan dili makabutyag sa iyang ngalan tungod kay wala silay ebidensya nga magpamatuod nga ang isda nga iyang gibaligya maoy hinungdan sa kamatayon ni Genelazo.
Matod niya, kinahanglan pa nilang paabuton ang resulta sa test sa DOH ingon man ang resulta sa autopsy.
“Baka unya na-cardiac arrest lang ang biktima,” matod niya.
Hinuon, ang kadagkoan sa kapulisan niingon nga ang kasong kalapasan sa Republic Act 10611, o The Food Safety and Security Act, giandam na alang sa pagpasaka sa korte batok sa person of interest sa higayon nga magpositibo ang resulta.
Ang mga kauban sa trabaho ni Genelazo -- Virgilio Supas, Haslenito Bonghanoy ug Jaymar Padillo - mikaon usab sa isda ug naluwas, bisan pa nga nakasinati sila og mga sintomas sa pagkahilo sa pagkaon, sama sa pagsuka, sakit sa tiyan ug kalibanga, mga oras human sa panihapon.
Si Supas na-confine pa sa Lapu-Lapu City Hospital, samtang sila Bonghanoy ug Padillo nanga-ayo human makainom og tambal.