DOH human sa food poisoning sa Asturias: Pagmatngon na

Nitumaw ang mga kabalaka sa lungsod sa Asturias, amihanang kasadpan sa Sugbo, human sa gidudahang food poisoning incident nga nagbilin og 11 ka mga tinun-an sa elementarya nga nangasakit human nikaon og homemade candies, hinungdan nga nipagawas og advisory ang mga awtoridad sa food handling and safety.

Sa report nga gipetsahan sa Martes, Septiyembre 19, 2023, opisyal nga gikumpirmar sa Department of Health sa Central Visayas (DOH 7) ang pagdawat sa mga taho bahin sa gidudahang food poisoning sa Asturias.

Gipaabot pa sa ahensya sa panglawas ang resulta sa laboratory tests nga gihimo sa mga sample nga nakuha gikan sa mga homemade candies, nga gitu­ohang tinubdan sa maong sakit.

Nahitabo kini dihang gikompirmar sa lokal nga awtoridad sa Asturias nga 11 ka mga tinun-an sa ikatulong ang-ang sa elementarya sa Barangay Manguiao ang daling gi-admit sa ospital niadtong Septiyembre 15.

Base sa mga taho, ang naobserbahan nga mga sintomas naglakip sa pagdaut sa tiyan, pagsuka, pagkaluya, ug pag­lubog sa mga eyeballs, ma­a­yo na lang, ang tanan nga mga tinun-an naka-recover ug na-discharge sa samang adlaw.

NABALAKA

Sa usa ka pamahayag, si Asturias Mayor Dana Andrew Dumdum nipadayag sa iyang kabalaka sa insidente, gipasiugda ang responsibilidad sa komunidad nga masiguro ang kaluwasan sa mga miyembro niini, labi na ang mga batan-on nga residente.

Gihatagan og gibug-aton ni Dumdum ang kamahinungdanon sa pag-amping sa pagkonsumo sa hinimo sa balay o dili pamilyar nga mga produkto sa pagkaon ug giawhag nga unahon ang kaluwasan ug pagkamabinantayon bahin sa gigikanan sa mga butang.

“We understand the concerns and questions that may arise from such an incident, and we want to assure the public that we will be transparent throughout the investigation process,” matod sa mayor sa Septiyembre 15.

Isip kabahin sa proactive nga mga lakang, si Dumdum miingon nga ang munisipyo sa Asturias naghunahuna sa pag-review sa mga regulasyon sa kaluwasan sa pagkaon, lakip na ang mga potensyal nga inspeksyon sa mga eskwelahan, aron mapalambo ang mga protocol sa kaluwasan.

MAGMATNGON

Ang ahensya sa panglawas nag-awhag sa publiko sa pagpatuman sa higpit nga mga pamaagi sa sanitasyon sa panahon sa pag-andam sa pagkaon, lakip ang hingpit nga paghugas sa kamot, husto nga pag-sterilize sa gamit, ug paggamit sa mga graded nga gwantes sa pagkaon, mga hairnet, ug mga tabon sa baba. / KJF