Gipalong sa mga eksperto sa panglawas ang mga kabalaka sa publiko kabahin sa bag-ong Nipah virus, taliwala sa mga taho sa mga sakit nga sama sa trangkaso sa lainlaing mga lugar sa amihanang Mindanao.
Ang mga lokal nga yunit sa gobyerno andam sa pag-atubang sa hulga gumikan sa ilang bag-o nga kasinatian sa panahon sa pandemya sa Covid-19.
Si Dr. Abdullah B Dumama Jr., undersecretary for field implementation and coordination team sa Visayas ug Mindanao sa Department of Health (DOH) nipasalig sa publiko nga walay kompirmadong kaso sa Nipah virus sa nasod.
Kini nga katin-awan tubag sa unang mga taho nga nagsugyot nga dunay Nipah virus outbreak sa mga estudyante ug school personnel sa Cagayan de Oro sa amihanang Mindanao sa Miyerkules, Septiyembre 27, 2023.
“This might be a respiratory syncytial virus. However, as of the moment, we have no any (Nipah) cases yet,” matod niya sa Lunes, Oktubre 2.
Ang respiratory syncytial virus komon nga respiratory virus nga kasagaran hinungdan sa huyang, sama og simtomas sa sip-on, sumala sa Centers for Disease Control and Prevention.
Niadtong Miyerkules, nipagawas og bag-ong kamandoan si Cagayan de Oro City Mayor Rolando Uy nga ibalik ang pag-obserbar sa minimum health protocols sa mga pampublikong lugar ug transportasyon.
Sumala sa ahensya sa panglawas, ang Nipah virus nahulog sa kategorya nga mga zoonotic virus, nga makahimo sa pagbalhin tali sa mga hayop ug tawo. Ang mga fruit bat o flying fox nagsilbing tipiganan sa virus.
Ang kasagarang unang mga simtomas naglakip sa hilanat, labad sa ulo, sakit sa kaunoran, pagsuka, ug sakit sa tutunlan.
Sa grabeng kaso, kini mosangpot sa encephalitis, hinungdan sa paghubag sa utok ug sa pipila ka mga higayon, mga kamatayon. / KJF