Napaig ang drayber sa motorsiko nga nibuto ug nisilaob sa kakusog sa impact dihang nabangga sa wing van sa national highway sa Barangay Tinaan, dakbayan sa Naga, alas 11:30 sa gabii, Sabado, Nobiyembre 30, 2024.
Ang biktima nga nagmaneho sa motorsiklo giila nga si Genolito Ramerez Ib-ib, 52, taga siyudad sa Sugbo.
Ang iyang nadasmagan nga sakyanan mao ang Sinotruk Hohan wing van nga gimaneho ni Teodoro Gador Matillano III, 49, minyo, ug taga dan Aguinaldo, siyudad sa Bais, Negros Oriental.
Sa pakiusi sa Superbalita Cebu, nasuta sa kapulisan sa Naga ubos sa kamandoan sa ilang hepe nga si P/Lt. Col. VerniƱo Noserale nga ang biktima gikan sa lungsod sa San Fernando sa habagatan ug mopauli na sa siyudad sa Sugbo.
Sumala sa kapulisan, pag-abot sa Tinaan sa Naga, ang biktima nilapas sa pikas lane nga gisubayan sa wing van nga ang niresulta sa head on collision o pagdinasmagay sa duha ka mga sakyanan.
Kalit nibuto ang motorsiklo ug nisilaob sa kakusog sa impact hinungdan nga napaig ang biktima, kinsa gidala sa Vicente Mendiola Center for Health (VMCH)-Infirmary sa Naga apan gideklarar nga dead on arrival (DOA) sa attending physician nga si Jerome Cabalo.
Samtang, ang drayber sa wing van naa sa kustodiya sa kapulisan sa Naga. /DVG