Patay ang drayber sa motorsiklo human nibangga sa kasugat nga multicab sa dalan Juana Osmeña, Barangay Kamputhaw, dakbayan sa Sugbo, pasado alas 10 sa Martes sa buntag, Mayo 16, 2023.
Ang biktima mao si Gleven Garces, 30, taga Duterte St., Sityo Kawayan, Banawa, Barangay Guadalupe, dakbayan sa Sugbo.
Matod ni Derrick Transe, drayber sa multicab, nga posibleng gituyo sa biktima ang pagbangga kay iyang gihulagway nga mipabulhot og padagan ang biktima sa motorsiklo.
Bisan nga nihunong na siya, matod ni Transe, si Garces giiingong wa niminor, gilahos ang motorsiklo padung sa iyangmulticab hinungdan nga naparok ang ulo niini sa windshield sa sakyanan nga niresulta sa iyang kamatayon. Si Garces wa nag-helmet.
Asoy sa hinigugma sa biktima nga si Michelle Baclayon, 26, nga nakainom si Garces busa nagdumili siya sa pag-angkas niini.
Sumala pa nga sa miaging gabii pa sila nag-away, giingong ang ilang panaglalis may labot sa ilang relasyon, walay labot ang third party.
Wa siya masayod nga naghubog diay kini ug giadto siya sa ilang balay sa Sitio San Roque, Banawa aron makig-estorya.
Giangkon ni Baclayon atol sa interview sa sibyaanang dyHP RMN Cebu nga nag-away sila samtang nagdagan ang motorsiklo nga gimaneho ni Garces.
Tungod kay wala silay helmet, kini maoy hinungdan nga siya nipugos pagkanaog duol sa usa ka hotel sa Juana Osmeña.
Sa dihang iyang giingnan nga mouna na siya ug mobiya, giingong miligid na hinuon sa kalsada ug mosugat na sa mga sakyanan.
“Gikan mi sa Banawa kay ihatod ko niya sa Baseline. Daghan man kaayo siyag yawyaw. Nikanaog ko diha sa Vacation Hotel, nag-away man mi ani. Ana ko ako na lang ang molakaw. Mohigda man nuon sa karsada. Dayon iyang sugaton ang mga sakyanan,” matod ni Baclayon.
Samtang sa wa pa ang insidente ang mga sakop sa Cebu City Transportation Office nga nagdumala sa trapiko sa dalan Escario, eskina Juana Osmeña, gipahibawo sa mga motorista nga adunay buot magpakamatay sa tunga sa dalan.
Gituohan nga naghikog si Garces kay kanunay niyang hisgutan nga gikapoy na siya sa iyang kinabuhi.