Drayber sa motorsiklo naangol human gipusil sa gunman nga nagmotorsiklo sa Martes sa buntag, Pebrero 28, 2023 sa Dan Sabellano, Sityo Macupa, Barangay Basak San Nicolas, Siyudad sa Sugbo.
Si Police Major Jonathan Beethoven Tañeo, hepe sa Mambaling Police Station sa Cebu City Police Office (CCPO), niila sa biktima nga si Dennis Empasis, hingkod.
Matud ni Taneo nga pasado alas 11:00 sa buntag, si Empasis nga nagsakay sa iyang motorsiklo nisubay sa Dan Sabellano.
Sa kalit lang duha ka mga tawo nga nag-angkasay sa motorsiklo niabot ug kalit siya nga gipusil sa angkas.
Natumba si Empasis sa karsada human naigo ang likod sa lawas.
Ang duha ka mga gunman daling nanibat samtang ang biktima daling gidala sa usa ka tambalanan sa kagamhanan.
Siya gidali sa pagdala sa tambalanan ug kasamtangan pang giobserbahan sa mga doktor.
Matud ni Taneo nagpadayon pa ang ilang imbestigasyon tungod kay kasamtangan pang dili nila maestorya ang biktima tungod kay naa pa sa intensive care unit (ICU).