Gisuspenso sa Land Transportation Office sa Central Visayas (LTO 7) ang Danao City-driving school ug usa sa mga instruktor niini human giingong nasuta nga niisyu sila og Theoretical Driving Certificates (TDCs) nga wala ipaubos sa gikinahanglang training ang ilang mga kliyente.
Sa pamahayag nga gipadala sa SunStar Cebu niadtong Lunes, Enero 9, 2023, si LTO 7 Director Victor Emmanuel Caindec niingon nga niluwat siya og suspension order batok sa NC Tiger Driving School ug sa usa sa mga instruktor niini nga si Luchen Tero, tungod sa giingong paglapas sa isyu sa TDCs ubos sa LTO Memorandum Circular (MC) 2021-2284.
Ang LTO MC 2021-2284 naglatid sa mga lagda ug regulasyon sa akreditasyon, pagdumala, ug pagkontrolar sa mga institusyon sa pagmaneho, ug ang standardisasyon sa edukasyon sa mga drayber.
Usa ka resolusyon ang gipagawas base sa imbestigasyon nga gihimo sa LTO 7 Regional Accreditation Committee (RAC) ug giaprobahan ni Caindec, human nakadawat og reklamo niadtong Septiyembre 2022.
Gitahasan ni Caindec ang LTO 7 RAC ug ang legal division head niini, Manlalaban Vincent Francis Bien Santiago, nga tukion pag-ayo ang mga reklamo nga direktang gipadangat ngadto sa regional director pinaagi sa iyang social media account, sa pipila ka mga indibidwal nga mibati og kakuwangan tungod sa pagpadrayb sa mga eskwelahan nga wala nagpahigayon sa gikinahanglan nga walo ka oras nga theoretical training para sa TDC certificates, usa sa mga kinahanglanon sa LTO para sa pag-isyu og student permit.
Human gipirmahan ni Caindec ang kamandoan, ang suspension order giisyu ngadto sa driving school niadtong Enero 6.
MGA SILOT
Ang maong kamanduan nagsilot sa NC Tiger Driving School Danao City Branch og P10,000 nga multa ug suspensiyon sa accreditation sulod sa tulo ka buwan.
Gawas sa driving school, silotan usab si Tero og multa nga P10,000 ug suspension sa accreditation sulod sa unom ka buwan.
Base sa imbestigasyon, ang driving school nagpahigayon og sesyon sa buntag ug hapon alang sa 40 ka mga tinun-an matag sesyon sa mga aplikante sa TDC.
Human sa aktuwal nga site/ocular nga pagbisita sa mga sakop sa Monitoring Committee sa NC Tiger Driving School Danao Branch, ang ilang duha ka lawak-klasehanan maka-accommodate lang og minimum nga 27 ug 24 ka mga estudyante matag instruktor matag sesyon kada adlaw, nga nakalapas sa gikinahanglan sa classroom base sa seksyon 10-B sa LTO MC-2021-2284.
Ubos sa mao nga circular, ang driving schools, mahimo lamang nga “makapahigayon sa minimum 15-hour TDC sa tulo ka adlaw, usa ka session kada adlaw.”
Human sa insidente, gimandoan ni Caindec ang RAC, Operations Division, ug Legal sa LTO 7 sa pagpahigayon og rehiyonal nga audit ug pagpalapad sa ilang imbestigasyon sa mga taho sa kaylap nga “no-test, same-day certification issuance” schemes sa mga accredited driving schools o nailhan lang sa publiko isip pag-isyu sa “no show” nga mga sertipiko.
Ang maong kamanduan naglangkob usab sa kapasidad ug compliance audits sa mga akreditadong medical clinics ug accredited dealers sa tibuok Central Visayas.
Gipadayag usab ni Caindec nga daghang mga show-cause order ang giandam base sa mga inisyal nga nahibaw-an, nga naglangkob sa daghan pang mga eskwelahan sa pagmaneho.
Matud pa ni Caindec, ang lakang gitumong aron masiguro ang saktong pagsunod sa mga akreditado nga entidad, subay sa giduso sa Department of Transportation alang sa pagpalambo sa pagdumala, ubos sa pagpangulo ni Secretary Jaime Bautista ug uban sa direksyon ug giya ni LTO Assistant Secretary Jose Arturo Tugade. (JKV, PR)