Usa ka drug surrenderer nadakpan sa mga sakop sa Philippine Drug Enforcement Agency (PDEA 7) Mandaue Office uban sa Mandaue City Police Office (MCPO) atol sa buy-bust sa dan San Roque, Brgy. Subangdaku, dakbayan sa Mandaue, alas 8:35 sa gabii sa Martes, Agusto 1, 2023.
Ang suspek giila nga si Ryan Flores, 34, chief cook, nagpuyo sa dapit, nakatapos sa iyang Community-Based Drug Rehabilitation Program apan nibalik sa iyang naandan nga negusyo.
Nasakmit gikan kaniya ang unom ka mga pakete sa gituohang shabu nga motimbang og 11 gramos nga dunay gibana-bana nga balor P74,800 lakip na ang buy-bust money ug usa ka cellphone.
Matod ni Leia Alcantara, information officer sa PDEA 7, nga nagpadayon ang PDEA 7 sa ilang monitoring sa mga barangay nga gideklarar nga drug-cleared aron mapabilin ang status niini.
Dugang butyag ni Alcantara nga gikan sa usa ka kasaligang tinubdan ang impormasyon nga ilang nakuha nga tungod niini gipaubos dayon nila sa usa ka semana nga case build up ang suspek.