Ang Department of Social Welfare and Development (DSWD) Field Office VII niawhag sa publiko sa paggamit sa digital platforms sama sa text hotline, e-mail, ug social media sa pagpangutana bahin sa Pantawid Pamilyang Pilipino Program (4Ps).
Pinaagi sa nagkalainlaing platforms, ang 4Ps beneficiaries ug non-beneficiaries sayon ug dali nga makaabot sa departamento bahin sa bisan unsang tuyo o mga pangutana.
Ang mobile users makapadala og mensahe pinaagi sa hotline number 0918-9122813. Sa 4Ps beneficiaries, gitambagan nga mogamit sa mosunod nga text format: 4PsHOUSEHOLDIDNUMBERPANGALANMENSAHE.
Samtang ang non-4Ps beneficiaries maka-text sa format nga DSWD4PsPANGALANMENSAHE.
Makahimo usab sila sa pagpadala sa electronic messages sa 4psassistance@dswd.gov.ph isip official e-mail address alang sa 4Ps concerns.
Ang netizens makapangutana sa social media pinaagi sa SWD’s Facebook fan page DSWD Region VII.
Ang 4Ps local operations office sa nagkalainlaing dakbayan ug kalungsoran modawat og mga reklamo o taho sa program implementation gikan sa walk-in clients, sama sa DSWD Field Office VII sa Barangay Carreta, dakbayan sa Sugbo.
Ang 4Ps clients kinahanglan nga magdala og identification card, sama sa ilang household ID.
Ang 4Ps grievance officers modawat og mga pangutana o reklamo, diin iproseso dayon alang sa verification, based on record ug field investigation.
Ang DSWD Field Office VII nakasulbad na og 6,342 ka reklamo gikan sa 6,769 ka mga kaso sa 2021 pinaagi sa 4Ps Grievance Redress System (GRS).
Ang 427 ka mga nagpabiling kaso nagpadayon alang sa pagresulbar ning tuiga.
Ang GRS usa ka mekanismo, o ang-ang sa mga pamaagi ug proseso, gigamit sa pagsulbad sa mga isyu ug reklamo nga kabahin sa pagpatuman sa 4Ps.
Nahimo kining hawanan sa mga benepisaryo ug publiko sa pagpadayag sa ilang rekamo ug mga sugyot sa pagpalambo sa programa. / PR