Ang Department of Social Welfare and Development Field Office VII (DSWD-7) nihatag og technical assistance sa mga local government unit (LGUs) sa pagdumala sa Disaster Assistance Family Access Card (DAFAC) alang sa mga pamilyang naapektohan sa bagyong Odette nga niigo sa Central Visayas (CV) niadtong Disyembre 16, 2021.
Ang DAFAC maoy monitoring tool sa paghatag og hinabang sa mga naapektohan sa kalamidad.
Duna kini sud nga batakang kasayoran bahin sa naapektohang pamilya, naglakip kon kini nagpundo sa evacuation center, bahin sa ilang balay o balay sa kabanay. Makatabang kini sa pagsubay sa mga serbisyo nga gihatag kanila gikan sa pagsugod sa kalamidad ngadto sa Early Recovery Phase.
“Effective data management is important in the services to typhoon-affected families. Hence, we are working hand in hand with concerned LGUs in the administration of DAFAC and encoding of the information gathered through DAFAC,” matod ni DSWD 7 Regional Director Rebecca Geamala.
Ang LGUs pinaagi sa City ug Municipal Social Welfare and Development Office (C/MSWDO), uban sa DSWD-7 field staff sa Pantawid Pamilyang Pilipino Program (4Ps), Kalahi-CIDSS, ug Sustainable Livelihood Program (SLP), ning-abag sa administrasyon ug paglista sa DAFAC.
Base sa Enero 17, 2022 nga talaan, ang rehiyon 7 nakatala og kinatibuk-ang 3,749,942 ka tawo o 1,164,364 ka pamilya nga naapektohan sa bagyo base sa taho nga nadawat gikan sa nagkalainlaing LGUs sa rehiyon.
Ang DSWD-7 niluwat na og P141.8 milyunes nga kantidad sa relief assistance nga naglakip sa 254,582 family food packs ug P6.9 milyunes nga balor sa non-food items.
Gawas sa food ug non-food assistance, ang DSWD-7 nilugway sa cash assistance sa mga pamilya nga naapektohan sa bagyo pinaagi sa Assistance to Individuals in Crisis Situation (AICS). Sa pagkakaron, ang DSWD-7 nakabayad na og P70.6 milyunes sa dili mominos 14,131 ka benepisaryo gikan sa 11 ka mga lungsod ug mga dakbayan sa Negros Oriental ug Bohol. (PR)