ANG Enhanced Partnership Against Hunger and Poverty (Epahp) sa Department of Social Welfare and Development (DSWD) nihimo sa iyang unang regional convergence meeting uban sa regional partners.
Ang DSWD, Department of Agrarian Reform (DAR), Department of Agrarian (DA) mao ang tulo ka lead national agencies, uban sa laing 28 ka mga ahensiya ug mga buhatan nga nag-uban alang sa pagtubag sa socio-economic problems sa komunidad.
Ang Epahp gitumong sa pagminos sa kagutom, pagseguro sa pagkaon ug nutrition security, ug pagpaubos sa kalisod o kakabus pinaagi sa DSWD programs sama sa Sustainable Livelihood Program (SLP), Supplementary Feeding Program (SFP), ug ubang programa sa mga ahensiya.
Ang paningkamot sa Epahp ug iyang mga kauban momugna og kutay ug mag-usa sa pagtabang sa rural communities sa pagpalambo sa ilang social capital ug economic resource base pinaagi sa supplementary feeding, ubang government feeding programs, ug ubang essential support services, lakip sa pag-apil sa community-based organizations (CBOs) sa serbisyo sa kagamhanan.
Ang Supplementary Feeding Program gipaagi sa usa ka community pantry sa DSWD Social Welfare and Development Office (SWAD)-Cebu grounds alang sa Nutrition Month celebration.
Ang community pantry nakasilbi sa kapin sa 200 ka mga kliyente sa Assistance to Individuals in Crisis Situation (AICS) gikan sa nagkalainlaing dakbayan ug kalungsoran sa lalawigan sa Sugbo.
Ang mga kliyente wala magpaabot na makadawat og libreng utanon tungod sa ilang bugtong tuyo mao ang pagpangay og hinabang.
Si Marissa Toledo gikan sa Danao City, Cebu, nagkanayon nga “wala gyud ko mag expect aning mga utanon. Salamat kaayo.”
Bugtong tuyo ni Marissa mao ang pagpangayo og medical assistance sa chemotherapy sa iyang pag-umangkon.
Ang community pantry nanghatag og kalabasa, sayote, patatas, carrots, pechay, repolyo, sweet potato, turnip ug saging. (PR)