DUGO nga giingong nakuha sa kawo ug senina sa 18-anyos nga lalakeng suspek sa pagpatay kang Christine Lee Silawan nitakdo sa laing sample nga nakuha sa National Bureau of Investigation (NBI) 7 gikan sa biktima ug ginikanan niini.
Gihulagway kini sa NBI nga dako ug positibong kalambuan sa ilang imbestigasyon sa kamatayon sa dalaga.
Nadawat sa NBI 7 ang resulta sa DNA test sa Huwebes, Abril 4.
Matod ni NBI7 Director Tomas Enrile nga paborable sa ilang habig ang resulta sanglit mitakdo kini sa ilang DNA samples gikan sa mga Silawan, nga nagpasabot nga kang Christine Lee ang mansa sa dugo nga nakuha gikan sa sapot ug kawo sa suspek.
Dako kini og ikatabang sa pagpalig-on sa ilang kaso tungod kay magpamatuod kini nga adunay kalabutan ang suspek sa pagpatay kang Christine Lee.
"Napakalakas na ebidensya nito. This will speak for itself na yung participation ng suspek, ay nandyan. Doctor na magpaliwanag," matod ni Enrile.
Una nang nihimakak ang kampo sa suspek lakip na ang inahan sa kalambigitan sa krimen kay giingong naa ra sa ilang lugar ang suspek atol sa pagkahitabo sa krimen.
Wa na mokomentaryo si Enrile sa findings sa autopsy sa Public Attorney's Office (PAO) sanglit ang ilang gi basehan mao ang resulta sa paghiling sa medico legal officer sa PNP Crime laboratory.
"Ako I would not rather comment sa findings nila. I would let Doc Lara make the proper comment kasi parang ang findings ni Doc Lara ay may contradict sa findings nila. We standby with the findings with Doc Lara. Di namin aanohin yung findings nila," matod ni Enrile.
Ang ginikanan sa saksi nga una nang giinterview sa media nga matod pa mibali na sa iyang pamahayag, nibalik na sa buhatan sa NBI aron ipaniguro nga wa sila mobaliktad sa kaso.
Apan matod ni Enrile nga bahala na ang inahan kon mopasaka ba silag reklamo batok kang manlalaban Vincent Isles ug sa usa ka tigbalita sa kasong obstruction of justice.
WA MABALAKA
Gipakagamay lang ni Isles ang giingong positibong resulta sa blood sample nga nakuha gikan sa senina ug kawo sa suspek.
Matod ni Isles nga wa pa siya makadawat sa resulta ug wa pa kini gipresentar sa NBI 7 sa piskaliya isip ebidensya.
Nakapangutana si Isles nganong wa siya hatagi sa NBI 7 sa kopya sa resulta. (AYB & GCM)