DUHA ang patay sa nahitabong sunog sa Sitio Ponce 2, Barangay Carreta sa Siyudad sa Sugbo alas 4:18 sa kaadlawon Mayo 11.
Ang mga namatay mao ang magtiayon nga silang Necasio Orcullo, 62, ug ang iyang asawa nga si Proserfina Arcachupas Orcullo, 57, human nga wala kini makagawas sa ilang balay.
Sa unang report na missing ang ilang apo nga si Sandy Arcachupas, 20, apan mipatima-aw kini niana nang pagkabuntag.
Matud niya nga wala siya makatulog sa balay sa iyang mga apohan kay didto siya natulog sa balay sa iyang hinigugma.
Ang pag-umangkon ni Proserfina nga si Temoteo Arcachupas mitug-an sa Superbalita Cebu nga sa dihang miulbo na ang kayo, nakamata pa unta ang magtiayon apan gikandado ang pultahan niini.
Sa dihang nangita na sila sa yawe, wala na nila kini makit-i gumikan usab sa kangitngit na ug misulod na usab ang aso sa ilang balay.
“Sila ra duha sa balay 'nya pagka sunog wala na sila ka gawas kay lisod kaayo kay gikandado man gud na ilang balay, na-trap sila kay wala siguro makaantos sa aso nakuyapan siguro mao nang wala na ka gawas kay dako naman kaayo ang aso.” Matod ni Temoteo Arcuchapas.
Gisuwayan pa unta nila pagguba ang pultahan sa magtiayon apan tungod kay ginama kini sa puthaw wala gyud kini maabli.
Ang mga sakop sa Scene of the Crime Operatives (SOCO) nakakuha sa duha ka patayng lawas nga pulos na napaig diin ang usa nga gituohan nga mao ang asawa sa sulod sa banyo samtang ang bana didto sa sala.
Matod ni Temoteo nga mahimo unta nga moambak ang magtiayon sa bintana sa ikaduhang andana apan tungod sa daling pagkatap sa kayo, nalumos na sila sa aso.
Nagsugod ang sunog matod pa sa panimalay ni Edna Basillote kadtong kontrobersyal nga balay nga nakuhaan og video footage nga gikulata matod pa sa mga pulis si Eddie Basillote.
Gitumbok sa mga silingan nga ang kapuyo ni Edna nga si Jason Hercisio ang tuyo nga misunog sa ilang balay tungod kay nakit-an kini nga nagsulod-gawas pasado alas 3 sa kaadlawon.
Matud pa, aduna kini dala nga galon nga gituohan nga mao'y gisudlan sa gasolina apan wala'y nakakita sa iyang pagsunog.
Matud ni Kapitan Marciano Ando sa Barangay Carreta nga arson ang insidente sa sunog tungod aduna'y nakakita kang Jason nga kadudahan ang linihukan.
“Arson gyud ni kay ang katong suspek nadakpan man ganina pero aduna'y gamay,” matud ni Kapitan Marciano Ando.
Human gitumbok nga si Jason ang nagsunog, gitabangan kini og kulata sa mga residente apan dali nga miresponde ang mga police aron dili magrabehan ang suspek.
Hugot ning gihimakak ni Jason Hercisio nga siya ang nagsunog sa balay sa iyang kapuyo kay wala na siya atol sa pag ulbo sa kayo.
Matud niya nga pasado alas 3, padung siya sa Pardo aron mopauli sa ilaha nga gikompermar usab ni Edna Basillote.
“Dili na tinuod oy. Wala jud ko diha pagkasunoga gyud kay naa ko sa Pardo ana, ako kunoy ga sunog kuno, nagdala kuno kog gasolina nagsige kuno kog lakaw-lakaw sa gawas. Mismo iyang papa kakita man nako nga nagbarog ra ko sa gawas kay nagpaabot ko sa yawe kay paingon ko sa Pardo,” matud ni Jason Hercisio.
Si Fire Chief Inspector Noel Ababon, ang Cebu City Fire Marshall, nagkanayon nga ila pang ipaubos sa imbestigasyon kon unsa'y hinungdan sa sunog.
Ila pa usab nga ipatawag si Hercisio kon tinuod ba nga siya ang nagsunog.
“Cause of fire ibutang nato sa under investigation, pero duna'y alleged nga gituyo kuno gani gi-safe keeping naman sa police 'tong koan kay gikulata man ganina,” matud ni Fire Chief Insp. Noel Ababon.
Wala ra maglisud ang mga bombero sa pagpawong sa kayo tungod kay daplin ra sa dalan ang mga balay nga nasunog.
Nadawat sa kabomberohan ang sunog alas 4:18 sa buntag ug gisaka nila sa 2nd alarm alas 4:21 ug nag 3rd alarm sila alas 4:28 ug gipaubos nila sa under control alas 5:15 na sa buntag.
Sa inisyal nga ihap sa mga sakop sa City Social Welfare and Services ug sa mga opisyal sa barangay Carreta miabot na sa 92 ka balay ang hingpit nga naugdaw.