Duwaan nga pusil gigamit sa tulisan?

Usa ka pharmacy sa Brgy. Poblacion Ward 1, lungsod sa Minglanilla gitulis sa nagbinugtong nga tawo niadtong Biyernes sa alas 2 sa hapon, Hulyo 28, 2023.

Duwaan nga pistola nakaplagan gawas sa pharmacy ug gituohan nga maoy gigamit sa tulisan.

Si Janice Cueva Fernandez, 40, nagdumala sa Three Sixty Pharmacy, niasoy sa kapulisan sa lungsod sa Minglanilla nga nag-atubang siya sa counter samtang nagpaabot og kustomer.

Niabot ang nag-inusarang tulisan nga nagsul-ob og dri-fit nga long sleeve shirt nga kolor puti nga dunay sagol green, nag-helmet og itom nga dunay logo sa usa ka brand sa motorsiklo.

Nagsul-ob kini og jogging pants ug sandal.

Nagpakaaron ingnon pa kini nga kustomer pinaagi sa pagpangutana og ngan sa tambal ug tagpila.

Kalit kining nibunot og armas nga gituohang kalibre .45 nga pistola dayon nideklarar og tulis.

Si Fernandez niingon nga tungod sa iyang kahadlok, iyang gihatag ang gibana-banang P7,000 nga halin.

Human nakuha ang kwarta, daling nisibat ang tulisan nga wa makit-i kon diin paingon.

Sa pagsuwat ning balita, ang kapulisan sa Lungsod sa Minglanilla padayon pa nga nag-imbestigar.

Nakaplagan usab sa dapit ang usa ka replica sa kalibre .45 nga pistola nga gituohang gigamit sa pagtulis ug gilabay sa tulisan sa iyang pagsibat.