Gikinahanglan nga iparehistro na sa mga residente sa lungsod sa Cordova, Sugbo ang tanang electric tricycle o e-trikes nga gamiton sa pagpamasada o sa pribadong paggamit.
Kini subay sa bag-ong naaprubahan nga ordinansa sa Konseho sa lungsod nga naglatid sa mga regulasyon ug palisiya sa operasyon sa mga e-trike sa tibuok lungsod.
Ang Ordinance No. 2023-111 nga gipangamahanan ni Konsehal Lemuel Pogoy, majority floor leader ug chairman sa committee on public utilities, communications, and transportation, nagtuo nga gikinahanglan nga marehistro ang tanang mga e-trike nga mobiyahe sa lungsod.
Kinahanglan nga moparehistro sa Traffic Management ug mo-renew usab matag tuig.
Gipahibalo sa kagamhanan nga ang mga bag-ong napalit nga e-trikes nga gamiton sa personal o commercial use kinahanglan irehistro.
Bisan og narehistro, gidili gihapon ang pagbiyahe niini sa national highway o major thoroughfares.
Ang mahimo nga makagamit o makamaneho sa E-Trikes kadto lang mga hamtong, dili pwede ang mga menor de edad.
Samtang, ang plitehan sa pagsakay niini P15 kon usa lang ang pasahero; P10 sa regular nga pagpamasahero; P2 nga discount alang sa senior citizens, estudyante, ug PWDs.
Ang mga walay rehistro ug mosupak sa lagda pamultahon og P500 ngadto na sa P2,500 o ba kaha imbarguhon ang unit niini.