Ang Edsa People Power Anniversary, nga giselebrar sa Pilipinas kada ika-25 sa Pebrero, dili na holiday sa 2024.
Ang Malacañang nipagawas sa Biyernes, Oktubre 13, 2023, og kopya sa Proclamation 368 ni Presidente Ferdinand Marcos Jr., nga nagtala sa holidays alang sa sunod tuig.
Apil sa listahan sa regular holidays mao ang Enero 1 (New Year’s Day), Marso 28 (Maundy Thursday), Marso 29 (Good Friday), Abril 9 (Araw ng Kagitingan), Mayo 1 (Labor Day), Hunyo 12 (Independence Day), Agusto 26 (National Heroes Day / katapusang Lunes sa Agusto), Nobiyembre 30 (Bonifacio Day), Disyembre 25 (Christmas Day), ug Disyembre 30 (Rizal Day).
Gideklarar nga espesyal (non-working) nga mga adlaw ang Agusto 21 (Ninoy Aquino Day), Nobyembre 1 (All Saints’ Day), Disyembre 8 (Feast of the Immaculate Conception of Mary), Disyembre 31 (Last Day of the Year).
Upat ka petsa ang gideklarar usab nga dugang espesyal (way-trabaho) nga mga adlaw. Kini mao ang Pebrero 10 (Chinese New Year), Marso 30 (Black Saturday), Nobiyembre 2 (All Souls’ Day), ug Disyembre 24 (Christmas Eve).
Walay apil sa listahan ang Edsa People Power Anniversary, nga gisaulog sa ika-37 nga higayon karong tuiga isip special non-working holiday.
Ang Edsa People Power, nga nahitabo niadtong Pebrero 25, 1986, nagpakita sa liboan ka mga tawo nga nagmartsa subay sa Epifanio de los Santos Avenue (Edsa) sa Manila nga nagsinggit alang sa kausaban samtang ilang gikondenar ang pagmando ni anhing diktador Ferdinand Marcos Sr., amahan sa incumbent nga Presidente. Gipukan sa rebolusyon ang diktaduryang Marcos sa samang tuig.