USA ka 33 anyos nga engineer nag-atang og kasakyan daplin sa B.B. Cabahug St. sa may Barangay Guizo, Dakbayan sa Mandaue, namatay, human madasmagi sa usa ka public utility jeep (PUJ) nga giingong nawad-an og brake.
Samtang duha usab ka mga pasahero sa PUJ nakaangkon og mga samad human nahulog sa sakyanan Huwebes sa buntag, Marso 7.
Ang biktima, kinsa nakaangkon og grabeng mga samad sa lawas, ilabi na sa ulo, giila nga si Elbert Dela Cruz Chan, taga Barangay Talamban, dakbayan sa Sugbo.
Si Chan usa ka engineer sa construction company sa dakbayan sa Lapu-lapu.
Matod ni Police Major Franco Rudolf Oriol, hepe sa Traffic Unit sa Mandaue City Police Office, nga si Chan ang nag-atang dayon nilakaw kilid sa dalan, samtang nagpaabot og kasakyan nga PUJ nga padulong sa Lapu-lapu City.
Kalit siya nga nadasmagan sa PUJ nga gimaneho ni Renato Llanos, 58, taga Taloot Proper, lungsod sa Argao, kinsa nagmaneho og PUJ nga 22G.
Matod ni Oriol nga nangangkon si Llanos nga kalit nawad-an og brake ang gimaneho nga PUJ.
Sa iyang pagkaratol ug kahadlok nga makabangga og mga sakyanan, iyang kalit nga gipadagan padaplin ang sakyanan.
Giingon nga wa siya makabantay nga adunay tawo sa kilid sa dan.
Human kini nakadasmag kang Chan, nilahos kini og bangga sa koral ug gate sa usa pribadong’ edipisyo.
Tungod sa impact sa pagdasmag, nangahulog ang iyang duha ka mga pasahero.
Nakaangkon og mga samad ang mga pasahero, apan anaa na sa luwas nga kahimatang, sila si Frances Agnes Catacan, 26,; ug Daphny Mosqueda, 53.
“Nagdagan ni sa may Guizo. According niya (driver), nawad-an og brake. Sa iyang karatol, iyang gipadaplin kay nahadlok siya nga makadasmag og daghan pa nga mga sakyanan kay daghan ang mga sakyanan na ato nga time. Sa pagpadaplin, wala siya kabantay nga sa may poste, naa diay tawo nga naglakaw, nadasmagan, napalawman sa jeep. Grabe na-sustain nga injury sa biktima,” asoy ni Oriol.
Giingon nga may pagka-dulhugon ang lugar nga nahitabuan.
Si Llanos anaa na natanggong sa MCPO detention cell ug gikatakda nga pasakaan og kaso nga reckless imprudence resulting in damage to property, with multiple physical injuries and homicide.