NIPASAR og resolusyon ang Sangguniang Panlungsod sa Ormoc City agi og pag suporta sa pag reschedule sa Eastern Visayas Regional Athletic Association (Evraa) nga ipahigayon sa Ormoc City.
Unang naaprobahan nga sa Marso 3 ngadto sa 8 himuon ang aktibidad apan base sa Resolution 2019 - 027, ibalhin kini sa Abril 7 ngadto sa 12.
Base sa maong resolusyon, gipadayag ni Ormoc City Mayor Richard Gomez ang mga rason sa pag reschedule sa Evraa.
Rason mao nga padayon pa nga gi renovate ang track and field oval, grandstand construction, ug elevated basketball court construction.
Lakip na ang pag improve sa mga billeting quarters ug water supply system aron mamahimong hapsay ang pag akomodar sa mga deligado.
Giklaro sa maong resolusyon nga ang di maayong dagan sa panahon ang hinungdan sa pagkalangay sa maong renovation.
Matod sa konseho, ilang nakita ang balido nga rason busa niuyon sila pinaagi sa maong resolusyon nga ibalhin ang petsa sa Evraa.
“Whereas, this august body sees the wisdom and practicality in the postponement of the Evraa to a later date to ensure the city, security, comfort, and convenience to the participant to the meet,” tipik sa resolusyon.
Gilauman sa dakbayan ang liboan ka bisita nga moabot atol sa maong aktibidad.
Giandam na usab sa kapulisan ang ilang mga security measures hilabi na sa mga lugar nga daghan og tawo.
Sa miaging tuig nahimong kampyeon ang Ormoc City sa Evraa. (JKDP)