Kanhi piniriso sa Cebu Provincial Detention and Rehabilitation Center (CPDRC) gipusil-patay sulod sa iyang balay alas 9:15 sa gabii sa Biyernes, Hulyo 28, 2023 sa Purok 2, Brgy. San Miguel, lungsod sa Cordova, Sugbo.
Ang biktima giilang si Glecerio Andales Untal, Jr. 42, minyo, nagnegusyo og buy and sell, patay nang niabot sa tambalanan.
Si Police Major Michael Gingoyon, hepe sa Cordova Police Station nga nahinabi sa Superbalita Cebu, nagkanayon nga usa ka wala mailhing gunman ang nipusil sa biktima.
Matod ni Gingoyon nga base sa kuha sa CCTV camera, usa ka wala mailhing lalaki nakasulod sa compound dayon nadungog sa mga kabanay ang sipang buto sa armas.
Sa pagsusi sa mga kabanay, samdan na si Untal nga nagbuy-od sa sala.
Matod ni Gingoyon, nga gisubay pa nila karon ang ubang mga kuha sa CCTV camera nga makatabang nga mailhan ang killer.
Gitan-aw sa kapulisan kon wala bay kalambigitan ang krimen sa negusyo sa biktima nga pagpamalit og second hand nga motorsiklo.
Ang negusyo iyang gisugdan human siya nakagawas sa CPDRC.
Gisubay sab nila ang impormasyon nga ang biktima nalambigit kaniadto sa ilegal nga drugas.
Matod ni Gingoyon nga lakip sa ilang gisubay mao ang kasong violence against women and children (VAWC) nga gipasaka sa iyang kabanay batok sa biktima.
Ang kapulisan nakarekuber sa usa ka kabhang sa kalibre .45 nga pistola ug usa ka slug sa bala. (GPL)