Si Jessica Lucila “Gigi” Reyes, kanhi chief-of-staff ni kanhi senador ug karon presidential legal counsel Juan Ponce Enrile, nakagawas sa detensyon niadtong Huwebes, Enero 19, 2023, matod sa Bureau of Jail Management and Penology (BJMP).
Ang BJMP niingon nga si Reyes gibuhian sa Taguig City Jail Female Dormitory mga alas 6:30 sa gabii pinaagi sa petition for habeas corpus nga gihatag sa First Division sa Korte Suprema sa Pilipinas.
Si BJMP Spokesperson Jail Chief Inspector Jayrex Joseph Bustinera niingon nga lakip sa mga kondisyon sa pagbuhi ni Reyes mao nga personal siyang motambong sa hearing sa ubang mga kasong kriminal nga gipasaka batok kaniya atubangan sa Sandiganbayan ug nga moduso siya og quarterly periodic report ngadto sa korte bahin sa iyang nahimutangan. Makuha niya ang travel authority gikan sa Sandiganbayan.
Ang korte niingon nga kinahanglang moduso sab si Reyes og quarterly report ngadto sa korte kabahin sa iyang pagtuman sa tanang kondisyon nga gitakda.
Sa usa ka desisyon nga gipagawas kaniadtong Enero 17, ang SC miuyon nga ang pagkabilanggo ni Reyes “nahimong malupigon, sa ingon, naglapas sa iyang katungod sa kagawasan.”
Sa iyang petisyon, si Reyes niingon nga ang mga paglangay sa mga husay ug ang panahon sa iyang detensyon mas taas kaysa bisan kinsa nga akusado nga parehas nga gipasakaan og kasong plunder.
“While the writ is generally not available to a person whose liberty is under custody of an officer under process issued by a court or judge, when such custody becomes vexatious, capricious, and oppressive amounting to an infringement on the constitutional right to speedy trial of an accused, the writ of habeas corpus may be provisionally availed of,” mabasa sa hukom.
Ang SC, hinuon, niingon nga ang pag-isyu sa writ of habeas corpus dili makaimpluwensya sa principal plunder case nga gisang-at batok kaniya.
Si Reyes ug ang iyang kanhi hepe nalambigit sa Priority Development Assistance Fund (PDAF) scam diin giingong ilang gipatipas ang pundo ngadto sa mga kadudahang non-government organizations ni Janet Lim-Napoles, ang giingong utok sa pork barrel scam.
Si Enrile giingong nakadawat og P172 milyunes nga kickbacks gikan sa public funds.
Siya gibuhian tungod sa humanitarian nga mga rason sa 2015 bisan pa sa pag-atubang sa non-bailable nga mga kaso. (HDT sa SunStar Philippines)