‘Fake’ gov’t ID sakmit; suspek sikop sa NBI

‘Fake’ gov’t ID sakmit; suspek sikop sa NBI

Usa ka 24-anyos nga babaye nasikop sa entrapment operation sa National Bureau of Investigation-Cebu District Office (NBI-CEBDO) tungod sa pagbaligya og peke nga non-professional driver’s license ug ubang government identification cards (IDs) sa atubangan sa Mandaue City Hall sa Miyerkules, Oktubre 11, 2023.

Giila sa mga awtoridad ang suspek nga si Gia Fernandez Genelaso, taga Barangay Labangon, dakbayan sa Sugbo.

GIPANID-AN

Sa press conference sa Huwebes, Oktubre 12, 2023, si NBI-CEBDO Agent-in-Charge Arnel Pura niingon nga usa ka semana nga ilang gipaubos sa surveillance ang suspek una gihimo ang aktuwal nga operasyon.

Matod ni Pura, usa ka ahente sa NBI ang nagtakuban nga usa sa iyang mga kliyente ug nihangyo kaniya nga iproseso ang driver’s license sa Land Transportation Office (LTO) sa kantidad nga P1,500.

Sa tibuok transaksiyon, si Pura niingon nga ang suspek nipasalig sa ilang ahente nga makuha dayon niya ang iyang driver’s license bisan dili makapasar sa driving test ug ubang rekisitos sa LTO, sama sa labing menos 8 ka oras nga Practical Driving Course (PDC) sa LTO accredited driving school ug balido nga Student-Driver’s Permit ug uban pa.

Niadtong Miyerkules, niadto si Genelaso sa Mandaue aron itunol ang lisensya sa pagmaneho nga gibayran pinaagi sa Cash on Delivery (COD) ug gidakop dayon siya sa NBI.

Matod ni Pura nga ilang gipadala ang lisensya sa buhatan sa LTO Region 7 aron susihon ang katinuod niini. Ilang gamiton ang certification sa resulta isip ebidensya batok sa suspek.

Sa pagkasikop, si Pura niingon nga ang NBI nakarekober usab og dugang mga peke nga ID gikan sa possession ni Genelaso, lakip ang lima ka Government Service Insurance System-Unified Multi-Purpose ID (GSIS-UMID), lima ka National ID, tulo ka postal ID, duha ka Bureau of Internal Revenue (BIR) Tax Identification Number (TIN) cards, usa ka PhilHealth card, ug usa ka Social Security System (SSS) ID.

Nakuha usab sa NBI ang iyang getaway nga motorsiklo.

GAMA SA KAULOHAN

Matod ni Pura nga sa ilang pagsusi, nasuta nga ang package nga gitipigan sa mga ID maoy gihatod ngadto sa suspek gikan sa usa ka manufacturer sa Lalawigan sa Bulacan.

Dugang pa niya nga ipadala nila ang delivery address sa NBI Bulacan District Office aron mohimo og area monitoring aron madeterminar ang mga kauban ni Genelaso.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph