Ang lungsod sa Asturias nagplano nga pauswagon ang iyang farm-to-market road aron mapausbaw ang ekonomiya niini nga nakasentro sa agrikultura.
Si Mayor Dana Andrew Dumdum nitug-an sa SunStar Cebu sa sideline sa unang adlaw sa Suroy-Suroy Sugbo Midwest tour niadtong Hunyo 10, 2023, nga P435 milyones ang giandam nga budget alang sa paghimo og mga karsada gikan sa interior nga mga barangay paingon sa sentro sa lungsod.
Ang dalan gibanabana nga modagan sa 11 ka kilometro, nga magdugtong sa mga umahan ngadto sa Poblacion o sentro sa lungsod, nga nagtugot sa daghang mga produkto nga dali nga mabalhin.
“Luoy kaayo atong farmers kay bati atong dalan. Atong gipaningkamutan nga mabuhat ning farm-to-market road kay para mas dali na ang pagdala sa ilang mga produkto diri,” matod ni Dumdum.
Labing minos 80 porsiyento sa P435 milyones nga budget maggikan sa World Bank, 10 porsiyento gikan sa Department of Agriculture, ug laing 10 porsiyento gikan sa local government unit.
Dugang pa ni Dumdum nga ila na karong gi-validate ang mga lugar nga himuong karsada aron kon andam na ang pundo, “smooth sailing” na ang construction.
Naglaum usab ang munisipyo sa Asturias nga sa padayon nga pag-uswag sa mga imprastraktura sa sulod sa ilang hurisdiksyon, daghang mga mamumuhunan ang moanha sa lungsod aron magsugod sa mga negosyo ug maghatag og mga trabaho sa mga residente.
“Andam na kami sa mga negosyo. We strive for our local government to be a business-friendly institution,” matod sa mayor sa Cebuano.
Sa laing bahin, si Dumdum niingon nga ang industriya sa baboy sa Asturias padayong milambo taliwala sa hulga sa African Swine Fever (ASF) sa Sugbo.
Iyang gipasabot nga ang lungsod wala gyud direktang naapektuhan sa sakit nga baboy.
Sa pagdumili ni Gobernador Gwendolyn Garcia sa paghimo og massive culling, pagsupak sa protocol sa Bureau of Animal Industry, nagpabiling lig-on ang industriya sa baboy sa Asturias. (DCL, RJM)