Kapin sa napulo ka mga pasahero sa usa ka fastcraft sa Supercat nga gikan sa dakbayan sa Ormoc ang angol human nabangga kini ngadto sa usa ka cargo vessel sa ilawom sa Mandaue-Mactan Bridge sa habig sa dakbayan sa Lapu-Lapu, alas 2:45 sa hapon sa Dominggo, Mayo 21, 2023.
Tungod sa kakusog sa impact sa pagkabangga, daghang pasahero ang nangaangol sa dihang napasok sila sa bangko sa sulod.
Apan atol ning pagsuwat, ang Philippine Coast Guard (PCG) ug Cebu City Disaster Risk Reduction Management (CCDRRM) team wala pa makahatag og tinong gidaghanon sa naangol human giuna nila ang pagluwas sa mga pasahero.
Si Harold Alcontin, pangulo sa CCDRRM team nga nahinabi sa Superbalita Cebu, daling nihimo sa pamaagi sa pag- plastar aron sa pag-asikaso sa mga pasyente sakay sa Supercat nga nabangga.
Dason niya nga sa inisyal nga kasayuran, dili moubos sa napulo ang naangol nunot na sa maong hitabo.
Si Atty. Erwin Nuñez, kanhi kawani sa SunStar Publishing ug usa sa mga pasahero sa fastcraft, nisaysay sa Superlalita Cebu nga nigikan sila sa pantalan sa Ormoc alas 12:00 sa udto ug gikatakda nga modunggo sa pier uno sa dakbayan sa Sugbo pagka alas 3:30 sa hapon.
Iyang gibutyag nga wala nila makita kon unsa ang nahitabo sa pagkabangga sa cargo vessel tungod sa kakalit sa hitabo.
Giingong nag-malfunction ang steering wheel sa ilang gisakyan nga Supercat, matod ni Nuñez, sigon sa pamahayag sa usa sa mga crew niini.
Dugang ni Nuñez, nasagmuyo ang mga pasahero tungod kay dugay kaayo nga naka-rescue ang mga awtoridad ilabi na ang Coast Guard sanglit milanat pa kinig usa ka oras.
“Sila naabot mga usa ka oras,” matod ni Nuñez sa kaduol sa nahitaboan.
Gihulagway sa abogado nga tungod sa kakusog sa impact nangatumba ang mga lingkuranan gani siya napasok man sa ilawom sa bangko.
“Kusog kaayo bisan ako napasok ko sa bangko, sakit akong siko, sakit akong chest,” dugang ni Nuñez. (AYB, BBT)