Usa ka Feng Shui expert nisulti sa mga negusyante nga magmapailubon ug dili kaayo agresibo sa pagpamuhonan ug kalamboan aron mahimong malampuson karong 2023 nga tuig sa water rabbit.
Si Emilie Gonzalez nitug-an sa SunStar Cebu sa usa ka zoom interview nga ang 2023 mao ang tuig sa Yin Water Rabbit, nga sa Chinese Zodiac sign, ang tubig sa Yin classy, hilom, ug hinay nga nagpasabot nga mas gusto sa mananap ang malinawon nga negusasyon ug dili away.
Kon itandi sa 2022, ang tuig sa Yang Water Tiger, ang tubig sa Yang gipakasama sa usa ka bagyo nga kusog, impulsive, ug agresibo.
Iya ning giluwatan taliwa sa pagsaulog sa Chinese Lunar New Year sa tibuok kalibutan karong Enero 22, 2023.
Sa iyang panglantaw sa ekonomiya sa Pilipinas karong tuiga, ang water rabbit nagdala og: Paglaum, Gugma, ug Paningkamot.
Samtang, ang 2023 magdala og kultura sa diplomasya pinaagi sa pagpausbaw sa komunikasyon nga makapugong sa global recession. (EHP / BBT)