Ang mga tag-iya og baboyan sa Carcar City kansang mga baboy gipanguha niadtong Marso tungod sa protocol sa Bureau of Animal Industry (BAI) sa pagpugong sa pagkaylap sa African swine fever (ASF) makadawat og hinabang pinansyal gikan sa City Government human sa Semana Santa.
Sa pakighinabi sa SunStar Cebu sa Miyerkules, Abril 5, si Carcar City Mayor Mario Patricio Barcenas niingon nga mokabat sa 50 ka backyard hog raisers gikan sa Barangay Can-asujan ang makadawat og financial assistance, nga magsugod sa P7,000 matag baboy pataas, depende sa gidak-on niini.
Hinuon, gilimitahan lang sa City Government ang hinabang ngadto sa 20 ka baboy matag tag-iya, kay kon dili, dili sila makonsiderar nga backyard hog raisers.
Ubos sa protocol sa BAI, ang tanang buhi nga baboy sulod sa 500-meter radius gikan sa ASF-infected area o mga umahan kinahanglang kuhaan aron malikayan ang pagkuyanap sa virus.
Niadtong Marso 13, gisuspenso ni Cebu Gobernador Gwendolyn Garcia ang pagpatay sa mga baboy sa dakbayan sa Carcar, partikular na sa kapin 500 ka baboy nga gikatakdang patyon.
Sa sayo pa, 141 ka mga baboy ang gipamatay sa Barangay Can-asujan. Lakip sa gipatay ang mga baktin ug baboy, matod ni Barcenas.
Matod niya nga wala na silay nadawat nga report sa ASF sa siyudad, ug iya kining gipasangil sa biosecurity measures nga gipatuman sukad niadtong Marso ning tuiga.
Gipasaligan niya ang iyang mga konstituwente nga ang ASF naa sa siyudad, apan ang estrikto nga biosecurity anaa gihapon alang sa dugang nga pag-monitor.
Matod sa mayor nga nagplano usab siya nga magtukod og tangkal sa baboy duol sa ihawan nga gipanag-iya sa Siyudad nga puy-anan sa mga baboy nga gipalit gikan sa gawas sa siyudad aron ihawon.
Pinaagi sa tangkal sa baboy, ilang ma-monitor ang himsog nga mga baboy nga gikan sa ubang local government units (LGUs) ug ma-isolate kini sa mga masakiton.
Giangkon usab ni Barcenas nga dili na masubay ang gigikanan sa virus nga hinungdan sa ASF sa Carcar City, bisan kon gikataho kaniadto nga ang sample nga nagpositibo kaniadtong Marso 1 sa usa ka ihawan sa Carcar City gikan sa usa ka baboy nga gikan sa Negros Oriental.
Ang maong baboy gikatahong gisagol sa ubang mga baboy gikan sa dakbayan sa Carcar. (EHP)