MOUMOL na unya ang kagamhanan sa dakbayan sa Mandaue og executive committee aron maghimo ug palisiya sa pagprotektar sa mga forest land labi na ang mangrove forest sa dakbayan.
Kini human nagpinirmahay ug kasabotan si Mandaue City Mayor Jonas Cortes ug ang Department of Environment and Natural Resources (DENR) alang sa Forest Land Use Plan (Flup) niadtong Martes, Setyembre 22, 2020.
Pinaagi sa pagpinirmahay muumol na ang dakbayan og mga palisiya aron .as maprotektahan ang forest land o ang mga mangrove forest sa dakbayan sa Mandaue.
Sa pamahayag ni Cortes, sigon niya nga ang maong kasabotan usa ka lakang alang sa dakbayan nga mas maatiman ang mga kalasanagan o bakhawan.
Kini usa sab ka lakang aron tabang sa dakbyan sa Mandaue sa dakong problema sa kalikopan mao ang global warming ug matod ni Cortes nga ang aksyon nga ilang gibuhat karon dakong ikaamot unya sa umaabot nga panahon.
Apan giawhag sab ni Cortes ang mga lumulupyo ug tanang sektor nga muabag sa lokal nga kagamhanan aron makab-ot ang pagprotektar sa kalikopan.
Sa pakighinabi sa Superbalita Cebu ni Jose Cleo Cary Colis, ang DENR Provincial Environment and Natural Resources Officer, nga ang dakbayan sa Mandaue wala kini kalasangan apan aduna kini bakhawan ngadto sa coastal barangays nga kinahanglang protektahan.
Kinahanglan sa usa ka lokal nga gobyerno ang Flup aron aduna sila 'sense of ownership' ug mas madumala nila ang mga kalasangan o bakhawan sa ilang lugar, sigon ni Colis.
Dugang niya nga importante sab kini alang sa Internal Revenue Allotment (IRA) sa local government unit tungod maapil na kini sa ihap sa land area usa ka dakbayan.
“Naay joint memorandum circular requiring LGUs before updating their comprehensive land use plan naa sab silay updated Flup mao nay basis sa internal revenue nga madawat,” sigon ni Colis, kinsa lisod mahuman dayon sa usa ka buwan.(KFD)