Gitataw ni Liloan Mayor Aljew Jordan Frasco nga dili tinuod ang mga pasangil nga nikatap sa social media nga naglambigit sa report sa Commission on Audit (COA) nga nag-flag down sa ilang pagpalit og 207 ka lechon nga nagkantidad og P1.537 milyunes niadtong 2022 ug nakahugaw lang sa imahe sa lungsod.
Sa iyang pamahayag nga giluwatan sa ilang opisyal nga Facebook page sa Huwebes, Hunyo 29, 2023, si Frasco namahayag nga ang maong isyo way ayo nga pagsulay sa paghugaw sa mga nahimo sa nangagi ug karon nga administrasyon.
“The recent allegations being circulated are nothing but dubious and spurious,” matod ni Frasco.
Dugang pa niya nga bag-o lang nihatag na usab og “unmodified opinion” ang COA sa Financial Statement sa Liloan niadtong 2022, nga nagtimaan sa pagkamakanunayon ug taas nga rating sa pagsunod sa lungsod sa accountability ug transparency sa pagdumala sa pundo sa publiko.
Kini ang ikalima nga higayon nga ang Liloan nahatagan sa COA sa maong recognition sukad sa termino ni kanhi mayor ug karon Tourism Secretary Christina Frasco niadtong 2017, 2019, 2020, 2021.
“I would like to clarify that the COA audit covers the year 2022 and the procurement of the lechon was not a one-time purchase but rather made on different dates for several occasions as inaugurations, general assembly, graduation exercises in support to official activities,” siya niingon.
Matod niya nga ang iyang administrasyon nagpabilin nga nagpraktis sa responsable nga pagpalit ug maayo nga paggahin sa pundo, nga nagpasiugda sa labing maayo nga mga tanyag nga mahatag sa mga Liloanon.
Busa, siya nipahayag nga sila magpadayon sa paghatag og mga paagi sa tanan nga mga negosyo aron pagtabang sa iyang mga konstituwente sa pagpalambo sa ilang mga produkto.
“The municipality will continue to be transparent and accountable to its stakeholders, ensuring that all transactions will be made in accordance with the procurement laws imposing therein a robust framework, which includes competitive bidding, fair evaluation processes, and a strict adherence to applicable laws and regulations,” siya nagkayon.
AUDIT
Sa 2022 Audit Report sa COA, naobserbahan sa state auditor nga ‘irregular and unnecessary’ ang pagpalit sa Liloan sa mga lechon nga nasupak sa Republic Act No. 7160 ug COA Circular Order No. 2012-003.
Matod sa COA nga gidili ang paggahin og pundo sa publiko o propiyedad sa pribadong organisasyon o relihiyusong grupo.
Kini nga mga lechon gisilbe alang sa pipila ka mga kalihukan sa lungsod sama sa team building, religious event, anibersaryo sa pribadong grupo, graduation exercise, assemblies, get-togethers ug uban pa.
Nitubag ang Lungsod nga kuwarta lang ang gidonar niini, diin gipalit dayon sa mga nakadawat og mga lechon gamit ang nadawat nga cash.
Apan wa makauyon ang COA sa tubag kay ang Bids and Awards Committee (BAC) sa Liloan maoy nipalit sa mga lechon.
Ang COA nirekomendar sa lungsod nga likayan ang maong mga galastuhan ug kinahanglang magmatngon sa paggasto sa pundo sa lungsod nga makabenepisyo sa mga konstituwente niini.
Samtang, gimanduan na ni Frasco ang mga hingtungdan nga buhatan nga likayan ang paghatag sa bisan unsang hangyo sa lechon alang sa bisan unsang kalihukan. (GK Marie Dejacto, CNU Intern)