Di mominos tulo ka mga buhatan sa Kagamhanan sa Dakbayan sa Lapu-Lapu ang giawhag sa pagdesinyo og programa alang sa ilang frontline services personnel nga mopaubos sa basic sign language training course.
Kini aron mas maayong maserbisyohan ang mga bungol nga residente ug mga kliyente sa City Government nga gikonsiderar nga persons with disability (PWDs).
Giaprobahan sa Konseho sa Dakbayan sa Lapu-Lapu atol sa ilang regular session sa Miyerkules, Septiyembre 7, 2022, ang giduso nga resolusyon nga gimugna ni Konsehal Annabeth Cuizon, nga naghangyo sa Office of the City Administrator, Human Resource Management Office, ug City Social Welfare and Development Office-Persons with Disabilities Affairs Office (CSWDO-PDAO) nga tukion ang pagdesinyo sa maong programa.
“I think government services should be accessible to all, even to the deaf mutes or any other PWD,” matod ni Cuizon sa SunStar Cebu.
“Usa sa atong mahimo mao ang pagtudlo sa atong mga frontline workers og sign languages para sa atong mga igsuong amang, dili na maglisod og communicate sa ilang mga tuyo diha sa mga staff sa opisina diin gitawag nato og mga frontlines. I also believe, that in an inclusive government, one should have the right to be heard,” dugang niya.
Ang konsehal niingon nga ang giaprobahan nga resolusyon subay sa pag-obserbar sa International Day of Sign Languages unya sa Septiyembre 23, nga ang katuyoan mao ang “to raise awareness of the importance of sign language in the full realization of the human rights of people who are deaf.”
Si Cuizon nakamatikod sa United Nations Convention on the Rights of Persons with Disabilities, nga nagmando sa estado sa paghatag og mga porma sa live nga pag-abag ug mga tigpataliwala, lakip na ang mga giya, magbabasa ug propesyonal nga mga tighubad sa sign language aron mapadali ang accessibility sa mga building ug uban pang pasilidad nga bukas sa publiko.
Si Junard Abalos, pangulo sa City Social Welfare and Development Office, nitug-an sa SunStar Cebu nga hugot nilang gisuportahan ang hangyo alang sa basic sign language training alang sa frontliners subay sa pagsalig sa administrasyon ni Mayor Junard Chan sa inclusive governance.