Gi-disbar sa botos nga 15-0 sa Korte Suprema ang bag-o lang gitudlo nga Presidential Adviser for Poverty Alleviation nga si manlalaban Lorenzo “Larry” Gadon tungod sa iyang “pagbalikas” sa usa ka journalist.
Matod sa tweet sa Public Information Office sa Korte Suprema sa Miyerkules, Hunyo 28, unanimous ang hukom sa 15 ka mga mahistrado sa pag-disbar kang Gadon tungod sa “viral clip where he repeatedly cursed and uttered profane remarks against journalist Raissa Robles.”
Matod sa Korte nga eskandaluso kaayo ang gibuhat ni Gadon isip abogado.
“The privilege to practice law is bestowed only upon individuals who are competent intellectually, academically and, equally important, morally. There is no room in this noble profession for misogyny and sexism,” matod niini.
Dugang niini nga nalapas ni Gadon ang Canon II on Propriety sa Code of Professional Responsibility and Accountability nga naglatid nga ang abogado kanunay nga “act with propriety and maintain the appearance of propriety in personal and professional dealings, observe honesty, respect and courtesy, and uphold the dignity of the legal profession,” base sa taas nga sumbanan nga dunay pamatasan.
Hinuon, si Gadon niingon sa usa ka pamahayag nga mo-file siya og motion for reconsideration tungod kay bug-at ra kaayo ang silot.
“....too harsh for the alleged cause which was my outburst against a reporter who was blatantly spreading lies against Pres BBM (Presidente Bobong Marcos) during the campaign period intended to fool the public on issues intended to cause damage to the candidacy.”
Giluwatan ni Gadon ang pamahayag pipila ka mga oras human sa tweet sa PIO sa Korte Suprema nga siya nasayod gikan sa iyang tinubdan nga ang korte mo-disbar kaniya.
Pipila ka mga adlaw ang nakalabay, si Gadon gitudlo nga presidential adviser ni Marcos tungod sa pagsalig sa Presidente kaniya sa pagtubag sa usa sa mga dakong problema nga giatubang sa nasod. (REV)