Sugdan na sa Kagamhanan sa Lalawigan sa Sugbo ang pagtrabaho sa dugay nang giplanong singko kilometros nga circumferential
road sa isla sa Malapascua.
Si Cebu Governor Gwendolyn Garcia nipahibalo nga iya nang gimandoan ang Provincial Engineering Office nga sugdan na ang pagtukod sa circumferential road bisan kon dili pa kompleto ang listahan sa mga mitugot sa paghimo sa maong dalan.
Giklaro ni Garcia nga ang sugdan nga dan, kadto lang anaa sa silangang bahin subay sa pagtugot sa mga nanag-iya niini.
Giingong nakapirma na ang maong mga tag-iya sa mga dokumento alang sa road right of way (RROW).
“So mao ni atong sugdan na ang Phase 1. Kaning red (western side), Phase 2, wa pa ni namirma so, di nato na masugdan unless mamirma sila,” matod ni Garcia.
Subay sa datos sa Provincial Engineering Office, moabot sa 16 ka lot owners ang nipirma ug ning-uyon sa circumferential road.
Sa nasayran, una nang giplano ang paghimo sa maong dalan sa 2004 kabahin sa development plan sa isla aron pagpalambo sa mga imprastraktura sa lugar aron may tarong nga maagian ang mga molupyo ingon man makaagni og daghang mga turista.
Ang maong lugar nailhan isip jump off point sa mga diving ug marine life enthusiasts ilabi na kadtong gustong makasaksi sa mga thresher shark sa lugar.
Subay niini, gilaoman sa gobernador nga mopadayag na sa pagtugot ang ubang mga nanag-iya sa nahabiling luna nga gikinahanglan sa RROW aron makapadayon sa Phase 2 sa maong dalan.
“Dako gyud kaayo na og tabang,” matod ni Garcia, bahin sa accessibility alang sa emerhensiya ug turismo.