Garcia gustong himuong ‘trauma center’ ang ospital sa Minglanilla

Gusto ni Cebu Governor Gwendolyn Garcia nga dugangan pa og pasilidad ang Minglanilla District Hospital (MDH) subay sa tinguha niini nga mahimong trauma center ang maong ospital sa probinsya.

Kini maoy nahisgutan atol sa tigom nga gitambungan nila ni Capitol consultant Dr. Mary Jean Loreche, Board Member Dr. Stanley Caminero ug uban pang mga sakop sa assessment team ni Loreche sa Miyerkules, Hulyo 19, 2023.

Apan aron kini makab-ot, gikinahanglan unang mosumiter ang MDH sa mga rekisitos sa Department of Health (DOH) alang sa accreditation niini isip Level I hospital ug dayon sa Level II.

Subay sa impormasyon sa Cebu Provincial Information Office, gusto ni Garcia nga i-convert ang hospital isip trauma center alang sa mga Sugboanong pasyente nga nakasinati sa traumatic injuries gikan sa mga aksidente sama sa pagkatagak, bangga o ba kaha napusilan.

Paagi kini nga ma-menosan ang mga pasyente nga kinahanglan pa nga i-refer sa mga hospital sa dakbayan sa Sugbo aron matambalan, labina sa Vicente Sotto Memorial Medical Center (VSMMC).

Gikinahanglan usab nga duna kini igo nga mga ekipo alang sa mga emerhensya nga kaso, outpatient services, isolation facilities surgical ug maternity facilities ingon man secondary clinical laboratory.

Samtang aron mahimong Level II ang usa ka hospital, dugangan usab og departmentalized nga clinical services sama sa respiratory unit, general intensive care unit, high-risk pregnancy unit, neonatal intensive care unit, tertiary clinical laboratory, blood station, ug second level X-ray.

Matod ni Dr. Jaime Bernadas, pangu sa DOH Central Visayas, nga ang naasoy nga mga serbisyo kinahanglan nga makompleto aron makab-ot ang nagkadaiyang level hangtod na nga mahimo usab nga trauma center.

Aron masugdan kini, gilauman ang pagdugang sa kapasidad sa infirmary ngadto na sa 150 ka beds.

Si Garcia una nang nitahas kang Loreche nga maoy mangulo sa pagsusi, pag-assess ug pag-recommend sa gikinahanglan nga mga pagpalambo sa upat ka mga provincial hospital ug 12 ka mga district hospital sa lalawigan.

Gawas sa kalimpyo ug serbisyo sa mga hospital ug infirmaries, apil usab sa assessment ang mga nagtrabaho sa sulod aron pagsiguro nga mahatag ang tukma nga alibyo ngadto sa mga pasyente gikan sa probinsya.