Mapasalamaton si Cebu Governor Gwendolyn Garcia nga gidungog na sa nasudnong kagamhanan ang mga polisiya nga gipangulohan sa Sugbo sa pakigbatok sa krisis bunga sa pandemic ug pagkatap sa coronavirus disease 2019 (Covid-19).
Kini subay sa rekomendasyon sa Inter-Agency Task Force (IATF) ngadto kang Presidente Ferdinand Marcos Jr. nga himuong non-obligatory na ang pag sul-ob og face mask sa lugar sa gawas kun open spaces sa tibuok nasod.
Verbal na kining giaprobahan sa Presidente, kinsa pormal pang moluwat og lagda alang niini.
Atol sa pakighinabi sa mga tigbalita sa Septiyembre 9, 2022 iyang gisaysay nga sukad sa pagpahibawo sa IATF, dunay pipila nga nangayo sa iyang pamahayag apan gusto una niyang magpakahilom.
Pipila ka mga higayon nga wala magkatakdo ang polisiya sa gobernador tali sa IATF ingon man sa Department of the Interior and Local Government (DILG) sa pagpatuman sa mga protocol sa Covid-19.
“I know that you have been asking me that same question two days ago and I chose not to react because the classier thing to do is not to react...Well, I am just so grateful that finally Cebu’s policies are now being reaffirmed by the IATF and I think however bumpy our relationship may have been in the past, I think we’re in for smooth sailing under a new composition of the IATF....”matod ni Garcia sa Septiyembre 9, 2022.
Unang nipatuman si Garcia sa lagda ubos sa Executive Order No. 16 sa optional nga pag sul-ob og facemask sa mga lugar nga hamugaway ug hawan sa probinsya sa Sugbo niadtong Hunyo.
Gisundan kini sa kamandoan ni Cebu City Mayor Michael Rama pinaagi sa iyang Executive Order No. 5 nga nagdeklarar nga dili obligado ang paggamit sa mga face mask sulod sa hurisdiksyon sa Dakbayan sa Sugbo sugod sa Agusto 31.
Nagsugod ang trial sa maong lagda sa Septiyembre 1 hangtod na sa Disyembre 31, 2022.
Tinguha ni Garcia nga mahimong gawasnon ang nasud sa nagkadaiyang restrictions nga nakapabug-at sa pagpanginabuhi sa mga Sugboanon.