GILARAW ni Cebu Governor Gwendolyn Garcia ang pagpadayon og promote sa Suroy-Suroy sa Sugbo ngadto sa mga turista sa Luzon area nga wa gipaubos sa enhanced community quarantine (ECQ) kun gawas sa National Capital Region (NCR) ug uban pang kanait mga probinsya.
Ang NCR ug upat ka mga dapit gipaubos sa ECQ tungod sa grabeng pagsulbong sa mga kaso sa coronavirus disease (Covid-19).
Ang pagdapit maoy paagi sa kagamhanan nga madungagan pa ang mga turista nga mosuroy sa tourist destinations sa lalawigan sa Sugbo, pagtabang sa tourism economy sa probinsya.
Atol sa pakighinabi sa mga tigbalita, gipasabot ni Garcia nga nakigsabot na siya sa Department of Tourism (DOT) ingon man sa mga airline companies nga mo-offer gihapon og samang price o plitehan alang sa ubang mga lugar bisan og sa Clark International Airport sa Pampanga kini manukad.
“We met with them and we are looking at promoting the Suroy Suroy usa while NCR plus four are still on lockdown or on ECQ nga i promote nato ang Suroy-Suroy for those that are not on ECQ nga province via Clark. And it will be the same price,” matod ni Garcia sa Marso 31, 2021.
Bisan pa sa gipatuman ang paghigpit sa ubang lugar, pasabot sa gobernador nga gitugotan gihapon ang essential travel.
“I think under the lockdown ug inyo tung basahon, essential travel ra ang gi-allow which means that automatically, rules out tourism or tourist related activities or travel from NCR plus,” matod ni Garcia.
Subay sa programa sa Probinsya, nalakip na niini ang roundtrip airfare, sakyanan sa pagsuroy, pamahaw ug paniudto ug kapahulayan.
Sa naasoyng packages managlahi ang rates sa mga turista gikan sa lokal o mga langyaw.
Alang sa Bantayan Island Getaway, anaa sa P8, 250 ngadto P18,750 ang mabayran sa domestic tourist samtang P6, 250 ngadto 16, 750 alang sa mga local tourist.
Sa Malapascua Island Getaway, P7, 550 ngadto sa P18, 050 sa domestic tourist ang mabayran samtang P5, 550 ngadto P16,050 sa local tourist.
Samtang sa Southern Adventure, Northern Escapade ug staycation, anaa sa P5, 500 ngadto sa P16, 000 ang mabayran sa local tourist samtang P7, 500 ngadto P18, 000 sa domestic tourist.
Una na nga gipahibaw ni Maria Lester Ybañez, pangu sa Provincial Tourism Office (PTO), nga target sa kagamhanan ang paglugway sa programa sulod sa unom ka buwan.
Gibuksan na sa Probinsya ang tourism activities niini niadtong Hulyo 2020 aron matabangan ang mga Sugboanon nga makabangon sa nasinati nga krisis tungod sa pandemya sa nasud.