Gihangyo ni Cebu Governor Gwendolyn Garcia ang kooperasyon sa mga kontraktor ug permit holders alang sa pagpahigayon og desilting sa Buswang River sa Barangay Cambang-ug, dakbayan sa Toledo.
Kini aron mapaspasan ang pagtrabaho sa pagsiguro nga malikayan ang pagsuyla sa sapa taliwa ning sunodsunod nga mga pag-uwan sa Sugbo.
Atol sa tigom kauban ang permit holders ning semanaha, nasayran ni Garcia nga dunay encroachment issues sa mga indibidwal nga naisyuhan sa industrial sand and gravel permits sa Mines and Geosciences Bureau (MGB 7).
Subay sa taho sa Cebu Provincial Information Office pinaagi sa Sugbo News, ang mga permit holders nga sila si Lida Ruelo, Gimar Besaes, ug Earl Daniel Dumadag nihunong na sa ilang operasyon sa sand and gravel mining sa sapa sukad niigo ang Odette sa Sugbo sa Disyembre 2021.
Pasabot ni Garcia nga kinahanglan nga mokooperar sila sa kagamhanan sa paghuman sa desilting sanglit bisan og gideklarar na ang pagsugod sa El Niño sa nasod, nagpabilin ang nasinating mga pag-uwan.
Ang desilting usa ka proseso sa pagkuha sa mga lapok ug balas sa kasapaan aron kini molawom pagbalik, sa ingon di na mosuyla ang tubig, ilabi na kon grabe ang pag-uwan. Kon dili kini maalibyuhan, posible kining mahimong hinungdan sa pagsaka sa tubig sa kabalayan nga duol sa nahimutangan niini.
Subay niini, pipila ka pribadong mga indibidwal ningsaad nga moabag sa RCV Construction aron mahuman ang pagtrabaho sa sapa. Kahinumdoman nga niapil na ang Kapitolyo sa desilting human gipahibaw ni Toledo City Mayor Marjorie “Joie” Perales ang kahimtang sa sapa sa siyudad. (ANV)