GCash misuporta sa pagpananom og kape

Sa pagtabang sa pagpalambo sa industriya sa kape sa Pilipinas, ang GCash nakigtambayayong sa The Philippine Coffee Board Inc. (PCBI) sa paggamit og science-based approach sa pagtanom og 200,000 ka punoan sa kape sa tibuok nasod pinaagi sa GForest, digital tree-planting nga kalihukan.

Ang lokal nga industriya sa kape nag-atubang sa daghang hagit, diin 33% lang sa mga liso sa kape sa merkado ang gihimo sa lokal tungod sa nagkalainlaing hinungdan, sama sa kakuwang sa kapital, limitado nga kahibalo sa pagtanum sa kahoy, ug pagpugong sa gagmay nga mga peste ug nataran sa mga mag-uuma.

Bisan kon naani na ang mga liso sa kape, ang mga mag-uuma kinahanglan usab moatubang sa kompetisyon sa presyo gikan sa gawas sa nasod.

Ang GCash ug PCBI nagtumong sa pag-edukar ug pagdasig sa mga Pilipino sa pagsuporta sa mga lokal nga produkto ug sa samang higa­yon paghatag og kahigayunan sa kababayen-an, nga naglangkob sa 50% sa mga mag-uuma.

“Using GCash not only allows our users to reduce their carbon emission by going digital, but also allows them to take an active role in our reforestation efforts via GForest. Through this partnership with PCBI, we envision to build agroforests that will not only help fight climate change, but also provide sustainable livelihoods to farmers and support the Philippine Coffee industry,” matod ni Artha Sazon, GCash President ug CEO.

Ang PCB usa ka grupo nga gipangulohan sa pribadong sektor nga gitukod niadtong 2002 sa mga eksperto sa kape aron sa pagpalambo sa industriya ug pagpalambo sa dekalidad nga kape nga Pilipino.

Kini pinaagi sa teknikal nga tabang ug mga programa alang sa mga mag-uuma ug pagtabang kanila sa pagbaligya ug pag-promote sa lokal nga kape alang sa domestic ug export nga merkado.

Kini nga proyekto maghatag og gikinahanglan nga long-term nga suporta sa lokal nga mga mag-uuma sa Cavi­te, Benguet, Iloilo, Davao, ug Basilan, nga makapahimo kanila sa pagsugod sa ilang kaugalingong mga umahan.

Kini nga programa magtudlo usab kanila kon unsaon pagtanom ug lokal nga mga semilya sa kape, pagkat-on sa siyensiya sa natural nga pag-uma sa kape, ug pagsinati sa lokal nga pagtimpla.

Ang presidente sa PCBI nga si Chit Juan nipaambit nga ang panginahanglan sa industriya sa kape sa Pilipinas halos 133 ka milyon ka kilo, nga nagpasabot nga ang matag tawo karon mokonsumo og 3 ka kilo nga kape matag tuig.

Matod niya, kini ang naghimo sa Pilipinas nga labing taas sa ASEAN og kunsumo sa kape ug ikaduha sa mga merkado sa Asya sa per capita consumption, matod sa bag-o nga taho sa Department of Trade and Industry.

Sa katapusan sa 2023, ang PCBI, sa ngalan sa GCash, magsugod sa pagtanom og 50,000 ka seedlings sa mga lugar nga giila sama sa Cavite ug Benguet.

Sa sunod nga duha ka tuig, molapad ang proyekto aron makab-ot ang tumong sa pagtanom og kapin sa 200,000 ka mga punoan sa kape.

Ang mga punoan sa landong itanom usab aron mapanalipdan ang mga punoan sa kape.

Ang mga plantasyon sa ka­pe nga gitanom sa landong makatabang sa pagpamenos sa mga pagbuga sa carbon pinaagi sa pagkuha ug pagtipig sa carbon pinaagi sa photosynthesis ug pag-apil niini sa sistema sa tanom.

Ang tibuok coffee agroforestry ecosystem magsilbing carbon sink nga makatabang sa pagbatok sa global warming ug pagtaas sa tempe­ratura.

Kini nga kolaborasyon nga proyekto kabahin sa GFo­rest nga inisyatiba sa GCash, ang pinakadako nga digital tree-planting nga kalihukan sa nasod, nga nagtugot sa GCash users sa pagpananom og kahoy nga libre pinaagi sa pagkolekta og “green energy points” nga nakuha gikan sa paggamit sa nagkalainlaing serbisyo sa app.

Kini nga mga puntos gamiton sa pagtanom og usa ka virtual nga kahoy, ug sa baylo, ang GCash, uban sa iyang lokal ug internasyonal nga mga kauban, magtanum ug usa ka aktuwal nga kahoy.

Sukad sa paglusad niini kaniadtong 2019, 14 milyunes nga mga tiggamit ang miapil sa GFo­rest ug nakatanom og tulo ka mil­yon nga virtual nga mga kahoy.

Sa pagkakaron, ang GCash nakatanom na og kinatibuk-ang 2.5 milyon ka aktuwal nga mga kahoy alang kanila. / PR