Nagpakita og paghinay ang ekonomiya sa Pilipinas human nitibugsok ang Gross Domestic Product (GDP) ngadto sa 4.3 porsiyento sa 2nd quarter sa 2023 gikan sa 6.4 porsiyento sa 1st quarter ning tuiga (Enero-Marso).
Samtang, 7.5 porsiyento ang pagtubo sa GDP sa samang panahon sa 2022.
Kini usab nagdala sa year-to-date nga economic growth rate ngadto sa 5.3 porsiyento, sumala sa Philippine Statistics Authority (PSA) sa Huwebes, Agusto 10, 2023.
Target sa administrasyon ni Presidente Ferdinand Marcos Jr. nga makab-ot ang unom ngadto sa pito ka porsiyento nga pagtubo sa GDP alang sa 2023.
Si National Economic and Development Authority (Neda) Secretary Arsenio Balisacan niingon nga aron makab-ot ang target, ang ekonomiya kinahanglang motubo og 6.6 porsiyento sa ikaduhang bahin sa tuig.
Siya miingon nga ang nasod magkinahanglan og 5.9 porsiyento alang sa katapusang tulo ka quarter aron makab-ot ang tumong.
Si Balisacan una nang nipadayag og pagsalig nga makab-ot ang target.
Ang PSA niingon nga ang dagkong mga nakatampo sa pag-uswag sa ikaduhang quarter mao ang wholesale ug retail trade; pag-ayo sa mga sakyanan ug motorsiklo, 5.3 porsiyento; pinansyal ug insurance nga mga kalihukan, 5.0 porsiyento; ug transportasyon ug pagtipig, 17.3 porsiyento.
Ang agrikultura, kalasangan ug pangisda, ug industriya ug serbisyo, nga mao ang nag-unang sektor sa ekonomiya, tanan nagposte og positibo nga pagtubo sa maong panahon nga adunay 0.2 porsiyento, 2.1 porsiyento, ug 6.0 porsiyento, matag usa.
Sa bahin sa panginahanglan, ang PSA niingon nga ang household final consumption expenditure (HFCE) mitubo og 5.5 porsiyento samtang ang pagsaka usab natala alang sa eksport sa mga butang ug serbisyo, 4.1 porsiyento, ug import sa mga butang ug serbisyo, 0.4 porsiyento.
GITAGNA NA
Ang hinay nga pag-uswag sa ekonomiya sa nasod sa 2nd quarter gitagna na daan.
Kini tungod sa monetary policy nga gipatuman sa Bangko Sentral ng Pilipinas (BSP), matod ni Charles Kenneth Co, presidente sa Cebu Chamber of Commerce and Industry ngadto sa SunStar Cebu pinaagi sa text message sa Huwebes, Agusto 10, 2023.
Gipasabot ni Co nga ang polisiya nga gitumong sa pagpausbaw sa interest rates alang sa pagpagaan sa inflationary pressure ug ubos sa paggasto sa gobiyerno tungod sa taas nga lebel sa utang. (SunStar Philippines, EHP)