Taliwala sa sunodsunod nga pagbaha sa dakbayan sa Sugbo, si Gubat sa Baha Taskforce Chairperson Roy Cimatu mopalambo sa kasamtangang drainage system gikan sa mga panimalay, kadalanan ug karsada, ug mga establisemento sa komersiyo ug isumpay kini ngadto sa mga suba ug agianan sa tubig sa siyudad.
Gitumbok ni Cimatu ang insidente sa pagbaha sa dakbayan sa buwan sa Septiyembre diin ang kusog nga pagbundak sa ulan sulod sa pipila ka oras niresulta sa pagbaha sa mga panimalay, establisemento, ug kadalanan nga nakahatag og dakong kahasol ug kadaot sa publiko.
Partikular niyang namatikdan ang pag-awas sa tubig sa uwan sa parkinganan sa usa ka commercial mall sa Barangay Banilad, dakbayan sa Sugbo human sa kusog nga ulan niadtong Septiyembre 11, 2023, diin daghang mga sakyanan ang natanggong sa gibahaan nga parkinganan.
Sa pagsusi, halos haw-ang ang kasikbit nga suba pipila ka metros gikan sa nahisgutang establisemento, matod ni Cimatu, diin iyang gipahibawo nga adunay problema sa drainage system sa nahisgutang mall.
“Nakita namin during sa aming mga inspections na meron flooding dito sa area na katabi sa river pero ang river walang tubig. So walang linya connecting sa flooded area at sa river. Eto ang aayusin natin,” matod ni Cimatu sa usa ka episode sa Sugboanon Channel sa Cebu City’s People’s Progressive Radio Media Network niadtong Miyerkules, Septiyembre 27, 2023.
Mao usab kini ang problema sa mga lugar nga daling mabahaan sa Siyudad, matod ni Cimatu, diin adunay dili igo nga drainage system nga moadto sa mga suba o rainwater catchment facility aron masulod ang taas nga volume sa tubig panahon sa kusog nga pagbunok sa ulan.
Matod niya nga ang presensya sa hugaw nga tubig panahon sa kusog nga pagbunok sa ulan nga gikan sa mga panimalay ug mga establisemento modagayday paingon sa karsada, inay adto mopadulong paingon sa suba.
Aron masulbad kini, kinahanglan nga adunay higpit nga pagpatuman sa mandatory alang sa mga komersyal nga establisemento ug mga panimalay sa pagkonektar sa ilang kasamtangan nga drainage system ngadto sa mga agianan sa tubig sa Siyudad, dugang ni Cimatu
Matod sa opisyal nga nakig-estorya na siya ni Cebu City Mayor Michael aron moluwat og Executive Order, pagtudlo og focal person nga modumala sa hugot nga pagsunod sa mao nga inisyatiba. / EHP