Duha ka mga lalaki nga “nikarnap” sa motorsiklo aron pabayloan og shabu sa Brgy. Duljo Fatima, dakbayan sa Sugbo, nadakpan sa mga polis sa Mambaling Police Station alas 4:20 sa kaadlawon sa Martes, Agusto 22, 2023.
Ang mga suspek giila sa Mambaling police nga sila si Greg Recaplaza, Jr., 24, taga Brgy. Pasil ning dakbayan ug Justin Ando Mendoza, 20, taga Brgy. Carreta. Sila positibong gitudlo sa mga saksi nga maoy ningkuha sa motorsiklo nga gi-park sa dalan P. Del Rosario, dakbayan sa Sugbo.
Naalarma ang kapulisan tungod sa duha ka mga tawo nga nagtuklod lang sa pagdala sa motorsiklo.
MIANGKON? Giingong giangkon sa duha nga sila ang ningkawat sa motorsiklo ug gidiretso nila og dala sa Duljo Fatima aron pabayloan og shabu nga mobalor og P3,000 apan sila nasikop sa kapulisan sa follow-up operation.
Si Police Major Jonathan Beethoven Taneo, hepe sa Mambaling Police Station, nagkanayon nga dili notado nga mga kawatan ang duha.
“Kining taga Pasil naa ni kaso nga illegal gambling nya kining usa, taga Carreta, naa kini kaso sad nga theft sa Mambaling area. Gani wala sila kabalo unsaon pagpaandar ang motor nga ilang gikawat. Ila ra ni gituklod paingon sa Duljo,” matod ni Taneo.
Niawhag na sila sa publiko kon kinsa ang nanag-iya sa motorsiklo kay mamahimo sila nga moadto sa Mambaling Police Station ug mopakita og dokumento nga magmatuod nga maoy tag-iya niini. /