Gisumbag, gipusposan, gisikaran ug gibitay ang tiil sa biktima atol sa pagpangdagit nga giingong gihimo sa mga sakop sa Special Operations Unit ubos sa PNP Drug Enforcement Group (PDEG 7) niadtong hinapos sa Marso ning tuiga.
Kini maoy paghulagway ni NBI Agent on Case Greg Algoso Jr. nga nitumaw sa ilang imbestigasyon sa mga kaso nga gisang-at sa mga biktima nga sila si Randolph Barliso Restauro, 30, ug Gemalen Elorde, 26, pulos taga Velmiro Heights Subdivision, Barangay Abono, lungsod sa Minglanilla, batok sa unom ka mga polis.
“Gisulod sila (opisina). Pag abot didto gi-torture, gipatug-an asa ang drugs. Pero before that ni travel sila gikan sa Minglanilla padulong sa siyudad. Gisigihan nana nila og sumbag. Pag-abot didto sa PDEG, gibunal-bunalan pa gyud. Naka blindfold naka posas. Gi torture nila sulod sa PDEG office ang lalaki ra gipusposan, gisumbag, gisikaran, gibitay pang tiil,” saysay ni Algoso.
(Laing estorya sa pahina 2.)
PRANK GONE WRONG
Subay sa gihimong pakisusi sa NBI, giingong way ilegal nga binuhatan ang mga biktima ug ang gidudahan nga shabu, usa lang diay ka komedya kun prank.
Nasayran, usa ka kusinero si Restauro sa gipanag-iyang kan-anan sa iyang maguwang ug nasuta nga joke lang ang pag-send niini og picture sa shabu ngadto sa iyang higala.
“Eventually nahibal-an nga kadtong iyang gipusasan binuang ra diay to niya sa iyang amigo. Unya nakaingon ang source nga kato diay gi-crop ra diay to niya gikan sa Pagadian Police nga post ug sa RMN Network nga post sa Facebook. Gibuhian kay negative man, di man tinuod nga naay drugs. Private na nga chat sa iyang amigo, gikomediyahan ra niya,” matod ni Algoso.
Unang gisusi sa NBI ang mga closed circuit television (CCTV) footages sa mga lugar diin nahitabo ang pagpanagit sa mga biktima.
Giingong naglisod ang buhatan sa pagsubay kon kinsa ang mga suspek hinungdan nga mihimo sila og dugang pagsusi ug pagpaila sa mga biktima kon kinsa ang mga polis nga ilang nakita atol sa panghitabo.
“Nag re-tracking mi sa asa sila niadto. Nadugay lang gyud mi sa identity na sa subject. Naka-gather mi og pictures and then among gipa-identify tagsa-tagsa unya based sa identity aning mga tawhana, mga police officers ni sila,” dugang ni Algoso.
Tungod kay wala may nakuha gikan sa mga biktima, gibuhian sila ug giingong gihatod sa Minglanilla kon diin sila gisignit.
Sa kasamtangan, naghuwat na lang ang NBI sa resolusyon.
IKIHA
Human niini, ipasaka ang kasong administratiba ug kriminal sa Ombudsman Visayas batok sa mga polis.
Ang mga suspek gipadad-an og subpoena apan usa lang kanila ang niduaw sa buhatan ug nihimakak sa hitabo, dugang ni Algoso.
Ang uban kanila nipadala na sa ilang mga abogado nga maoy motubag sa maong mga pasangil.
Sa unom ka mga suspek, upat lang ka kanila ang nailhan samtang kadtong duha nga nagmotorsiklo wala.
Kasong kidnapping and serious illegal detention ug kalapasan sa R.A 6713 kun Code of Conduct and Ethical Standards for Public Officials and Employees alang sa grave misconduct ang atubangon sa maong mga pulis.