ORMOC CITY. Nauli na sa iyang pamilya ang 15 anyos nga dalagita nga gidagit human gipasakay sa usa ka puti nga van sa Sityo Liberty, Barangay Camp Downes, Ormoc City.
Matod sa kapulisan, nahitabo ang pagdagit alas 8:00 sa gabii, Dominggo, Agusto 7, 2022 apan pagka alas 10:00 sa buntag, Lunes, Agusto 8, 2022, gibalik sa mga suspek ang biktima pipila ka metros gikan sa ilang panimalay.
Matod ni Police Colonel Nelvin Ricohermoso, direktor sa Ormoc City Police Office (OCPO), gidala dayon sa hospital ang biktima aron masusi.
Walay nakita nga timailhan nga giabuso ang bata ug way ilhanan nga nakasinati kini og pisikal nga pag-abuso.
Gisugilon ni Police Major Rizal Antonio Leung, hepe sa Police Station 1, wa maka may-on ang biktima sa mga nidagit kaniya gumikan kay pulos kini nag-bonnet.
Saysay sa biktima nga gidala siya sa usa ka lawak nga walay mga gamit ug nangutana ra mahitungod sa iyang amahan ang mga suspek. Padayon karon nga gisubay sa kapulisan ang mga CCTV sa lugar nga posibleng giagian sa van ug nakatutok usab karon ang ilang imbestigasyon sa amahan sa bata.
Apan sa gipahigayon nga Ormoc City Peace and Order Council meeting, gipadayag ni Ricohermoso ang iyang kasagmuyo sa amahan human kini wala na mokooperar sa imbestigasyon. Matod ni Ricohermoso, nilarga na sa Samar ang amahan kauban ang 15 anyos nga anak.
Dugang pa ni Ricohermoso, dako kaayo og tabang sa imbestigasyon ang amahan niini tungod kay mao kini ang target sa mga nidagit sa iyang anak.