Lalaking giilugan og microphone sa iyang silingan nga gisabaan samtang siya nag videoke nanunggab mga alas 8:10 sa gabii sa Biyernes, Marso 24, 2023 sa Brgy. Consolacion, lungsod sa Dalaguete, habagatang Sugbo.
Ang suspek nga nasikop sa niresponding kapulisan giilang si Antonio Binarao, 36, mananagat, dunay kapuyo, nagpuyo sa lugar.
Ang biktima nga iyang suod nga higala giilang si Rodelo Gamboa, 34, ulitawo, mananagat, nagpuyo sa lugar, nalandig sa tambalanan kay nakaangkon og mga samad dinunggaban sa wala nga bukton, kilid sa liog ug dunggan.
Si Police Staff Sgt. Rex Pelonio, imbestigador sa Dalaguete Police Station nga nahinabi sa Superbalita Cebu, nagkanayon nga nagtagay ang suspek uban sa iyang igsuon ug mga barkada samtang nag videoke.
Tupad ra ang panimalay sa biktima sa gikantahan sa suspek.
Ang inahan ni Rodelo nga si Ricarda, 59, nigawas sa balay, giimbarguhan og microphone si Binarao samtang nagkanta sa awit nga Binilanggo sa Gugma.
Matod ni Pelonio nga gisabaan si Ricarda kay nagkalawom na ang gabii ug padung na sila mangatulog.
Wa usab kini nakauyon sa tingog sa suspek.
Tungod niini, nasuko ang suspek ug nagkalalis sila ni Ricarda.
Ang usa sa mga anak ni Ricarda nilaban sa inahan busa nahitabo ang kagubot.
Nikuha og kahoy ang igsuon ni Rodelo ug gibunalbunalan si Binarao.
Sa kalagot sa suspek, nikuha siya og kutsilyo apan si Rodelo, suod niya nga higala, nipatunga aron unta mahupay ang kasuko.
Ang suspek nga nalango na sa giinom nga bino, giingong nidunggab sa biktima.
“Alingogngog na kaayo paminawon, bati pa gyud og tingog. Mao nga giimbarguhan sa microphone,” asoy ni Pelonio.
Sumala pa niya nga ang inahan sa biktima gisabaan na kaayo kay gabii.
Sa imbestigasyon sa kapulisan, ang suspek nibutyag nga naglagot kay wala siya nakatiwas pagkanta sa iyang paboritong awit.
Tungod kay nakainom, wala na niya nakontrolar ang kaugalingon ug iyang nadunggaban ang iyang higala.
Nangayo siya og pasaylo sanglit duna sab siyay upat ka gagmay nga mga bata.
Ning pagsuwat, gipaabot sa kapulisan ang biktima alang sa pormal nga pagpasaka og kaso. (GPL)