BUOTAN, manggihunahunaon sa pamilya ug nagsupota sa pagtungha sa mga manghod sa probinsiya ang brutal nga gipatay sa wala pa mailhing mamumuno.
Si Charie Mae Mancia, 23, napalgan sa iyang board mates nga wala nay kinabuhi nga napuno og samad dinunggaban ang lawas ug gigulgol ang liog sud sa kawarto nga giabangan sa Sitio Potat, Barangay Tinago, dakbayan sa Sugbo, alas 5:30 kagahapon sa kaadlawon, Nobiyembre 4.
Si P03 Andrew Denila, desk officer sa Waterfront Police Station, nagkanaon nga usa ka Stephanie Llanes, board mate sa biktima, nakadungog og komusyon sa kwarto sa biktima ug giingong aduna kini kauban nga lalake nianang alas 5:00 sa buntag.
Giingong susama og nagpakitabang ang babaye. Sa dihang iyang gituktok ang kwarto ni Mancia, way nitingog.
Nibalik si Llanes sa iyang kwarto ug pipila ka minutos, iyang nadunggan ang tunob sa tiil nga nigawas gikan sa kwarto sa biktima.
Sa dihang iyang gisusi, nakita niya ang niwang nga lalake nga nagsul-ob og pulang t-shirt ug itom nga jeans nga naglakaw palayo sa balay.
Daling gisusi ni Llanes ang kwarto ug maoy nisugat sa iyang panan-aw ang nagkadugo na nga si Mancia.
Nakasinggit siya og panabang hinungdang nakamata ang ubang kauban sa balay. Gitaho dayon sa barangay ug ngadto sa kapulisan.
PANAGNA SA PULIS
Gituohan sa kapulisan nga kaila sa biktima ang mamumuno o posibling uyab niya kini.
Sa unang pakususi sa kapulisan, nasuta nga nawala ang cellphone sa biktima.
Nakuha sa kapulisan ang kutsilyo nga adunay blue nga kuptanan diha ma sa kanal mga 30 metros ang gilay-on gikan sa boarding house sa biktima.
Ang sa hepe sa Police Station 3 sa Cebu City Police Office (CCPO), Sr. Insp. Joemar Pomarejos, niingon nga tanang anggulo ang ilang gitan-aw sa maong kaso.
“Padayon pa ang imbestigasyon as of this time. Continue ang pagkuha sa information lakip na ang identity sa mga tawo nga naa sa palibot niya,” matod ni Pomarejos, kinsa sa pagkutlo ning balita wala pay nasikop nga suspek sa krimen.
TAGA ALOGUINSAN
Ang biktima lumad nga taga Barangay Tampaan, lungsod sa Aloguinsan ug first year student sa kursong Accountancy sa Asian College of Technology (ACT).
Matud sa iyaan nga si Josephine Antig, si Mancia nagtrabaho samang higayon sa usa ka dakong fastfood chain sa dakbayan sa Sugbo, gikan sa hapon hangtud sa tungang gabii, ug nagtungha sa buntag.
Dihang wala pa mitungha sa ACT, nitrabaho kini sa mga department store ug sa Mactan Export Processing Zone (MEPZ) sud sa pipila ka tuig human ni-graduate sa high school.
Ang biktima nagdako sa iyang lola sa Aloguinsan ug gipahuman sa high school sasuporta sa iyang iyaan sa Talisay City.
Bisan natungha kolehiyo isip working student, siya ang nagpatungha sa iyang 21-anyos nga manghud nga amang sa Special Education sa Pinamungajan ug nagpa-eskwela sa iyang 14 anyos nga manghud sa grade 6.
Human nga gibiyaan na sila sa amahan ug ang inahan naminyo na pag-usab, ang biktima nibarog sa responbilidad isip ginikanan.
Hinuon, katambayayong niya ilang inahan sa mga galastuhan sa igsuon.
NANAWAGAN
"Di’ makatuo ang pamilya sa nadangatan kay bag-uhay lang usab sila nakahibalo nga adunay uyab ang biktima, gani wa pa nila mailhi ang pangan niini," matod sa iyang iyaan nga si Antig nga naghulaka nga nag-asoy sa Superbalita Cebu.
“Unta mo-surrender na siya (mamumuno), grabe ra kaayo ang iyang gibuhat oyy, wa nalang ta niya patya. Daghan pa kaayo na’g pangandoy bataa, mao pay gisaligan sa mga manghud. Siya gyud ganahan mo-eskwela, nagtigum siya para pang-enroll ug iya pa gipaeskwela ang mga manghud,” panawagan ni Antig. (B)