KADTONG suspek sa investment scam sa siyudad sa Davao nga gipatay sa lungsod sa Balamban niadtong Agusto 20 sa gabii ang gilubong nalang sa kapulisan tungod kay wala nay mi claim sa patayng lawas niini.
Ang napatay naila nga usa ka Armando Oppus giingong founder sa usa ka investment scheme sa dakbayan sa Davao.
Gipahibawo ni Police Major Christian Torres, hepe sa Balamban Police Station, nga niadtong milabayng semana ang mayor sa maong lungsod mihukom na nga kinahanglan ilubong si Oppus tungod kay taas na kaayo ang panahon nga naa ra kini sa morgue sa punerarya sa maong lungsod.
Matod ni Major Torres nga kadtong nanawag sa ilang police station nga nagpaila nga kabanay ni Oppus wala gyud kini mo tunga aron kuhaon ang patayng lawas niini. Apan gipasalig ni Major Torres nga mahimo rang habwaon ang lubong ni Oppus kung adunay moabot nga kabanay.
“Taod-taod naman gyud nya ni reklamo naman ang punerarya nga wa gyuy ni claim sa patayng lawas. Mao to ang punerarya ug LGU nag tinabangay nalang nga malubong nalang, in kaso kung naay mo-claim pwede man to ma habwa pagbalik,” padayag ni Police Major Christian Torres. (AYB)