GIUNAY og pusil sa lalake ang iyang kapuyo dihang paingon silang motambong sa graduation sa ilang anak nga mograduwar sa Balao Elementary School sa barangay gym sa Balao, lungsod sa Barili, mga pasado alas tres kagahapon sa hapon.
Ang suspek nga si Syrent Anotado, 38, giingong mipusil sa ulo sa iyang kapuyo nga si Lucilita Rebuyas, 34, gamit ang .38 kalibre nga armas.
Gikataho nga sa pag-abot ni Rebuyas gikan sa dakbayan sa Sugbo aron motambong sa graduation sa ilang kamaguwangan nga anak, nagkaaway na sila sa iyang kapuyo.
Giingong di na maayo ang relasyon sa duha sud sa tulo ka tuig.
Dihang ang duha diha na sa gym aron maghuwat sa graduation sa ilang anak nga mograduwar sa Grade 6 sa Balao Elementary School, nakit-an ni Anotado, lumad sa Guihulngan City, Negros Oriental, ang iyang kapuyo nakigtabi sa inahan sa lalake nga giingong mao nay gidudahan niyang gikarelasyon sa iyang kapuyo.
Ning higayona, si Anotado, kinsa giingong nakainom, nipusil sa tangkugo sa kapuyo.
Human sa hitabo, nitahan gilayon si Anotado sa usa ka Cafgu militia samtang ang iyang asawa gidala sa Barili District Hospital, apan patay na kining niabot.
Si SPO3 Marcelo Quevedo, imbestigador sa Barili Police Station nga nahinabi sa Superbalita Cebu nagkanayon nga ang motibo sa kremin selos.
Matod pa ni SPO3 Quevedo, nga graduation sa mga anak dihang gipusil atubangan sa ilang mga anak ang inahan.
Ang bala miungot sa walang apapangig ni Rebuyas.
Unang nipaso ang ilang 13 anyos nga anak sa grade 6, apan wa na madayon ang pagpaso sa manghod tungod sa hitabo.
Sumala pa ni Quevedo nga way lalis nga nahitabo, diretsong gipusil sa tangkugo ni Anotado si Rebuyas gamit ang .38 kalibreng snubnose revolver.
“First honor ang iyang 9 anyos nga anak babaye nga tinun-an sa grade 3. Wala na makapaso. Kalit kaayo ang panghitabo,” dugang ni Quevedo.
Ilang nasayran nga ang manag live-in partner nagbuwag-uli.