BIYERNES sa gabii, Pebrero 12, 2021, nag-inusarang nagrosaryo sulod sa ilang payag si Virgie Erojo, 62, sa Barangay Lawaan, lungsod sa Alcantara.
Dihang kalit nga nilanog ang sipang buto sa pusil nga nadunggan sa iyang kapuyo ug mga kabanay.
Pagsusi na ni Nelson Egarote, kapuyo, naglunang sa dugo ug patay na nga may samad pinusilan sa mata si Erojo.
Matod ni Police Master Sergeant Richard Cababat sa Alcantara Police sa interbyu sa Superbalita Cebu, ilang nadawat ang alarma mga alas 10:30 sa gabii.
Sa pag-abot sa lugar sa iyang mga kauban, ilang naabtan si Erojo nga naghayang nga wa nay panimuot. Sa pagsusi sa mga medicial personnel, wa nay pulso ang biktima.
Si Nelson nisulti sa kapulisan nga ang iyang kapuyo nagrosaryo niadtong higayuna dihang gipusil.
Ang bala niigo sa mata ug nilapos sa likod sa ulo.
Nagkupot pa sa rosaryohan si Erojo dihang naabtan sa mga pulis.
Matod ni Cababat nga ang sumbohan sa pusil nga wa pa matino ang kalibre gipalusot sa buslot sa bongbong sa payag.
Si Police Chief Master Sergeant Nestor Tonilon sa Alcantara Police Station, kinsa maoy imbestigador, nibutyag nga wa pa silay naestablisar nga motibo kay way kontra si Erojo.
Bisan si Egarote niingon nga way kaaway ang iyang kapuyo.
Si Egarote nisulti hinuon nga sa gikan sila sa iyang kapuyo sa sentro sa barangay dihang gisundan sila og duha ka mga tawo nga nagmotorsiklo.
Apan nawala ra sab ang duha nga wa nila mailhi pag-abot sa eskina.
KILLERS NAG-SUV
Tindero og isda nga natulog namatay diha-diha human pusila sa makadaghan sa wa mailhing tawo sulod sa ilang balay sa alas 3:15 sa Sabado sa kaadlawon, Pebrero 13, 2021 sa Sitio Upper Campo, Brgy. Poblacion, lungsod sa Pinamungajan.
Si Edilberto Lumongtad, 51, dunay kapuyo, namatay sa daghang mga samad sa iyang lawas.
Si Police Corporal Ryan Mangilimotan sa Pinamungajan Police Station nga nahinabi sa Superbalita Cebu nagkanayon nga si Lomongtad natulog uban sa iyang kapuyo ug mga trabahante sa pagpamaligyag isda sa iyang balay.
Sumala ni Mangilimotan nga ang mga saksi mibutyag nga pito ka mga tawo nga naka-bonnet nga nagsakay og sports utility vehicle (SUV) maoy responsabli sa kremin.
Ang usa kanila mao ray nisulod sa lawak ni Lomongtad ug gipusil sa makadaghang higayon.
Wa na masuta kon asa mipadulong ang mga killer human sa pagpatay.
Si Mangilimotan nibutyag nga nakadungog sila sa mga tabi-tabi nga nalambigit sa illegal si Lomongtad ug nadakpan na kaniadto, apan wa sila masayod kon unsa nga matang kay wa silay record.
Upat ka kabhang sa wala matinong kalibre sa armas ang narekuber sa crime scene.