USA ka 27 anyos nga babaye, nga gihulagway nga kanunay madala sa police station kay mareklamo sa pagpangawat sa Siyudad sa Talisay napalgan nga patay sa Barangay Cuanos, lungsod sa Minglanilla.
Giila sa mga kabanay ang gituohang biktima sa salvage nga si Archela Caballero, taga Barangay Lagtang, Siyudad sa Talisay.
Si Cabellero napalgang patay nga adunay samad pinusilan sa dughan.
Siya nakit-an sa gamay nga hawan taliwala sa kasagbutan, daplin sa dalan sa sitio Banggaan, Cuanos, bukirang barangay sa lungsod sa Minglanilla, Miyerkules sa buntag, Hulyo 10.
Nadawat sa kapulisan sa Minglanilla ang taho alas 8 na sa buntag. Apan matod ni Police Lieutenant Sylvanos Abella, mga bata ang unang nakakita sa lawas nga nag-ubo.
Pipila sa mga residente nga nidugok ang nipahayang na niini aron sa pag-ila kon kabanay ba nila.
Dugang ni Abella nga pipila sa mga residente sa Cuanos giingong nakadungog og usa ka buto sa pusil Martes sa gabii, Hulyo 9.
Apan wala na nila gisubay tungod usab sa kahadlok.
Nagkahugaw-hugaw ang suot pa nga dakong t-shirt ug shorts ni Caballero.
Gitan-aw sa kapulisan nga sa lugar gipatay ang biktima.
Dugang ni Abella nga ipaubos sa autopsy ang lawas aron sa pagtino kon wa ba kini hilabti ug unsay hinungdan sa kamatayon niini.
“Noted lage daw ni siya nga kawatan sa Talisay. Sige ni siya madala sa police station, pero ang problema magpabuang-buang daw dayon ni. Mao dili gyud ma-priso,” saysay ni Abella.
Suliran sa pangisip
Ang mga kabanay nga nituyo sa lugar diin napalgan si Caballero niangkon nga adunay sakit sa pangisip ang biktima.
Usa sa sakit niini ang manghilabot gyud og butang.
Giingon nga Martes alas 2 sa hapon, Hulyo 9, katapusan nga nakit-an sa kabanay ug silingan, gikan sa ilang balay human kini gi-pick-up sa usa ka barangay tanod sa Lagtang, kay gireklamo na usab nga nangawat.
“Naa gyud na siyay sakit. Amo nana siya unta nga gibantayan. Naabot pa gani sa punto nga gapuson na siya sa balay. Pero maayo kaayo, makagawas gyud. Sakit na gyud na niya nga manghilabot gyud og butang. Manulod sa balay, murag clipto,” asoy ni Marilyn Villaver, ig-agaw ni Caballero.
Sutaon sa kapulisan sa Minglanilla ang taho nga gikuha kini sa barangay tanod nga naila lang sa ngalan nga Jerry.
Kini aron masubay kon si kinsa ang nipatay ug nganong gipatay ang biktima.