Giklaro sa Department of Education (DepEd) Schools Division of City of Naga ang mga impormasyon nga nikatap sa social media kabahin sa giingong pagka-late ni Gobernador Pamela Baricuatro atol sa opening sa Central Visayas Regional Athletic Association (Cvraa) meet.
Subay sa nikatap nga mga impormasyon sa social media, giingon nahimong hinungdan sa kalangay sa pagsugod sa parade o opening program tungod kay gihuwat pa ang gobernador.
Diha sa giluwatang pamahayag sa DepEd Naga City Division, giklaro niini nga wala ma-late ang gobernador ug nihaom lamang sa gihatag nga oras ngadto kaniya ug sa staff niini.
Matod niini, daan nang gipahibalo ang gobernador nga moabot atol sa pagsugod sa parade ug gani giingong nagpaabot siya diha sa assembly area alang sa mga VIP aron moapil sa Cebu Province delegation.
Ang Cvraa gisugdan niadtong Marso 22 ug natapos sa Marso 27, 2026, diin gitambungan kini sa mga atleta gikan sa Central Visayas alang sa sangka sa paugnat sa kusog.
Subay niini, si Atty. Leviticus Barazon Jr., Assistant Schools Division Superintendent sa DepEd City of Naga, nagpahinumdom sa publiko nga likayan ang pagpakatap sa mga unverified nga impormasyon nga giingong makatabon sa kadaugan ug kahago sa mga tinun-ang atleta.
Iya sab gipasalamatan ang tanan nga nisuporta sa kalihukan lakip ang mga bisita nga naglangkob sa kadaugan sa programa alang sa mga tinunan sa Central Visayas.